Amanat partııasynyń quryltaıyndaǵy úsh máseleni aıryqsha atap ótkim keledi. Birinshi, Adal partııasynyń bıleýshi partııaǵa qosylýy. Jalpy, bul álemdik tájirıbedegi qalypty jaǵdaı.
Amanat partııasy tarıhynda osyndaı birneshe kezeńnen ótken bolatyn. «Otan» partııasy qurylǵan kezde I quryltaı sezinde saıası uıymnyń quramyna Qazaqstan halyq birligi partııasy, Qazaqstannyń demokratııalyq partııasy, Qazaqstannyń lıberaldyq qozǵalysy, «Qazaqstan – 2030 úshin» qozǵalysy kirdi. 2006 jyly «Otan» partııasynyń quramyna «Asar», Qazaqstannyń Azamattyq partııasy jáne Qazaqstannyń agrarlyq partııasy kirdi. Halyqaralyq tájirıbege nazar aýdarsaq, damyǵan elderdiń jetekshi partııalary da birigý prosesinen ótkenin kóremiz. Jáne bul saıası qadam elimizdiń partııalyq-saıası júıesinde aýqymdy ózgerister baıqala bastaǵanynyń aıqyn kórinisi.
Prezıdent Qasym-Jomart Kemeluly bıylǵy naýryz aıyndaǵy «Jańa Qazaqstan: Jańarý men jańǵyrý joly» atty Joldaýynda bılik ınstıtýttaryn kúrdeli qaıta qurylymdaý men teńgerimdeý baǵytyndaǵy úderisti erekshe atap ótken bolatyn. Partııalyq zańnamany ózgertý boıynsha usynylǵan bastamalar partııalyq qurylymnyń tamyryna qan júgirte bastady. Bul qadamdy Adal partııasy saıası keńesiniń Amanat partııasyna qosylý týraly sheshim qabyldaýynan anyq kórýge bolady.
Búgingi jahandyq ekonomıkalyq jáne geosaıası daǵdarys jaǵdaıynda el Prezıdentiniń saıası reformalardy júzege asyrýy burynǵydan da ózekti ekenin ýaqyttyń ózi dáleldep berdi. Amanat bılik partııasy retinde partııalyq alańdaǵy jaǵdaıdyń boljamdy bolýyna, belgili bir oıyn erejeleriniń saqtalýyna múddeli. Adal partııasynyń saıası alańdaǵy is-áreketi Amanat partııasynyń saıası rıtorıkasynan sonshalyqty alshaq emes bolatyn. Sondyqtan partııalardyń qosylý prosesi eldik maqsat-murattardy júzege asyrýda bir núktede túıisedi degen sóz. О́zderińizge málim, Adal partııasy 2020 jyly rebrendıngten keıin jumysyn qaıta qurylymdaý arqyly aıtarlyqtaı kúsheıdi. Mysaly, partııanyń «Skrınıng» sııaqty qyzyqty jobalaryna nazar aýdarýǵa bolady. Joba aıasynda úı sharýashylyqtary men kásipkerler tekserildi, «Otbasylardyń sıfrlyq tólqujaty» qalyptasty, partııadan saılanǵan aýyl ákimderiniń jumysyn ádistemelik qoldaý boıynsha jumystar júrgizilýde. Demek, Amanat partııasynyń jumysy modernızasııalaý men transformasııalaýda jańa sapaǵa kóteriledi degen sóz.
Ekinshi, Memleket basshysy Qasym-Jomart Toqaevtyń Amanat partııasynan shyǵatynyn resmı túrde málimdeýi. Jalpy, ashyq qoǵam qalyptastyrýǵa qadam basqan elderde saıası kúshterge teń jaǵdaı jasalýy kerek. Ákimshilik resýrstardan ada, aqparattyq júıe teńgerimdi jumys júrgizip, halyqtyń tańdaý jasaýyna jaǵdaı týǵyzý úshin Memleket basshysynyń partııalarǵa degen beıtaraptyǵy asa qundy. Osy oraıda «saıası tarazynyń» bir jaǵy basyp ketpeýin qamtamasyz etý mańyzdy jáne saıası mádenıettiń negizgi kórsetkishi deýge bolady.
Úshinshi, partııaǵa jańa tóraǵa bolyp Májilis Spıkeri Erlan Qoshanovtyń saılanýy. Ol – óte ashyq jáne mádenıetti adam. Árıne, Memleket basshysy ustamdy jáne utymdy usynys jasady. Erlan Jaqanulynyń qatardaǵy jumysshydan bastap orta jáne joǵary deńgeıdegi laýazymdardy abyroımen atqarǵany tájirıbeli tulǵa ekenin kórsetedi. Myrysh sapyryp, mys qaınatqan, ken qazǵan eńbekshilerdiń qadirin biledi. Kómirli óńirdegi ákimdik qyzmetinde halyqtyń bel ortasynda júrip, máseleni ishten kórip jáne sheshý joldaryn qarastyrǵan. Al Prezıdent Ákimshiliginiń Basshysy laýazymynda bolǵanda memlekettiń basqarý júıesiniń kúngeıi men teriskeıin qatar sezingen azamat. Májilis Spıkeri retinde túrli bıýrokratııalyq barerlerdiń tamyryna balta shaýyp, halyqqa tıimdi zańdar qabyldaýdaǵy erik-jigerin sát saıyn sezinip te, kórip te júrmiz. Demek, saıası uıymnyń jetekshisi retinde de qoǵamdyq ózgerister men saıası reformalardyń júzege asýyna yqpal etetini daýsyz.
Janarbek ÁShIMJAN,
Májilis depýtaty