Nur-Sultan qalasy kásipkerler palatasynyń alańynda Básekelestikti qorǵaý jáne damytý agenttigi departamentiniń kedergiler jónindegi keńesiniń kezekti otyrysy ótti. Onyń barysynda Qazaqstannyń basqarýshy jáne servıstik kompanııalar qaýymdastyǵynyń elordada aqyly avtoturaqtardyń ulǵaıýyna qatysty ótinishi qaraldy, dep habarlaıdy Egemen.kz kásipkerler palatasynyń saıtyna silteme jasap.
«Ákimdiktiń qaýlysyna sáıkes aqyly turaq oryndarynyń sany 24-ten 536-ǵa deıin ósti, bul 10 myńǵa jýyq turaq orny. Sonymen qatar bul pýlǵa bastapqyda oılaǵandaı, ıesiz, jol boıyndaǵy avtoturaqtar emes, buryn ǵımarat ıeleri jalǵa alǵan avtoturaqtar kirdi. Qala olardy jeke menshikke satyp alýǵa múmkindik bermeıdi, óıtkeni olardyń astynda ádette ınjenerlik jeliler jáne t.b. ótedi. Bul turaqtar osy pýlǵa alyndy. Biz «Atamekenge» jazdyq, osy sátti pysyqtadyq. Bul máseleni qazir kóterip jatyrmyz», dedi otyrysta sóz sóılegen Qazaqstannyń basqarýshy jáne servıstik kompanııalar qaýymdastyǵynyń tóraǵasy Qaırat Kókenov.
Onyń aıtýynsha, ákimdik bul jerdi Nur-Sultan qalasynyń Kólik jáne jol-kólik ınfraqurylymyn damytý basqarmasyna bergen.
«Bul basqarmanyń basshysy bizge bul jalǵa berý emes, bul basqarma dep jaýap berdi. Biraq is júzinde Nur-Sultan naryǵynda monopolıst qurylýda, ol joldar janyndaǵy ıesiz turaqtardy basqaryp qana qoımaı, ǵımarattar men qurylystardyń janyndaǵy barlyq turaq oryndaryn da qamtıtyn bolady», dedi Qaırat Kókenov.
Ol mundaı tájirıbe qurylys normalary men erejelerin (QNjE) buzatynyn atap ótti, óıtkeni olarǵa sáıkes ǵımarat turaqsyz paıdalanyla almaıdy. Sonymen qatar aqyly turaq oryndarynyń kóbeıýi jol boıynda stıhııalyq turaq qurýǵa ákelýi múmkin.
«Qaýymdastyq músheleri talap-aryz jumystaryn júrgizip jatyr. Ǵımarattardyń aınalasynda aqyly turaq oryndaryn qurý obektilerdiń tartymdylyǵyn tómendetedi, óıtkeni turaqtarsyz birde bir obekt klıentterge qyzyǵýshylyq tanytpaıdy. Avtoturaqsyz bıznes qulaıdy», – dedi Qaırat Kókenov.
Sondaı-aq kedergiler jónindegi keńes músheleri kóterilgen máseleniń ózektiligin atap ótti.
«Iá, shynynda da, naryqty monopolııalandyrý qaýpi tónip tur. Máseleni respýblıkalyq kedergiler Kartasyna engizý úshin egjeı-tegjeıli zerdeleýdi usynamyn», dedi kedergiler jónindegi keńestiń tóraǵasy, Nur-Sultan qalasy Kásipkerler palatasynyń dırektory Beısen Jolboldıev.