Meıirim degen ne osy? Sezim be, qasıet pe, álde emosııa ma? Múmkin kóńil kúıdiń áserinen týyndaıtyn minez shyǵar? Sol meıirim adamda taýsyla ma eken? Bálkı, júrek qataıyp, ystyq sezimder óshken kezde meıirim de muzǵa aınalar. Eger ol tek sanaly janǵa tán qasıet bolsa, onda nege álemde soǵys bolyp jatyr? Nege adamdar bir-birine ádiletsiz? Osy joldardy jazyp otyryp, meıirim degen sózdi gýgldan izdep kórip edik. Syǵanaq 19 kóshesindegi «Meıirim» medısınalyq ortalyǵy atyp shyqty. Al biz izgi minez týraly sóz qozǵap otyrmyz...
Jumyr jerdiń betinde tirshilik bastalǵan ýaqyttan beri aıtylyp kele jatqan jalǵyz suraq bar: álemdi ne ustap tur? Bul tipti adamzattyq saýalǵa ulasyp, túrli ǵylym salasynda hám ádebıette de, ónerde de, kınoda da máńgilik taqyrypqa aınaldy. Oǵan árkim ártúrli jaýap berer: bireý álemdi qara jer ustap tur dese, bireý Qudaı, bireý adam der. Bálkı, aqsha, bálkı, aýa. Pýtın dep te aıtatyndar tabylar (tańǵalmańyz). Keı adam dúnıeniń kilti izgilikte deıdi: jaqsylyq pen jylýlyq, meıirim men sezim. Al mahabbat she? Endi bireý álemniń ustyny adamdardyń birligi der. Iá, Ýkraınadaǵy eki aıdan astam ýaqyttan beri bolyp jatqan qaqtyǵystar júrek aýyrtar áserinen bólek barsha álemge bir uǵymdy uǵyndyrǵan sııaqty. Birlik.
Birlik degen de ulttyq minezge jatatyn hám qanmen sińetin qasıet bolsa kerek. Baıqasańyz, ultshyl, patrıottyq rýhy bıik halyqtardyń birligi myǵym bolady. Máselen, irgemizdegi О́zbekstan. Ýkraındardy da dál qazir úreı men qorqynyshtan alshaq ustap turǵan osy – birlik. Iаǵnı birlik – tek bes-alty adamnyń birigip jumys isteýi emes, keıde tutas bir ulttyń, memlekettiń taǵdyryn sheshetin sátte de kúsh beretin qasıet. Tarıhqa kóz salsańyz, ulttyń uıyǵan birligimen aman qalǵan, ıakı azat bolǵan elder kóp. Sonda birlik ortaq kelisim, aýyzbirshilik syndy uǵymdardan buryn ulttyq minezden týady. Iаǵnı naǵyz birlik adamǵa tek qanmen keledi.
Eger osy uǵymdar álemdi ustap turǵan bolsa, adamdy adam qylyp turǵan ne degen oıǵa da qalasyń. Árıne, adamdyq qasıetter, aq adal kóńil, keń peıil, ystyq júrek, sýyq aqyl dep bárimiz aıtamyz ǵoı. Alaıda keıde qoǵamdaǵy sumdyq jaǵdaılar osy izgi minezderdi bir sátte joq qylady. Bir jaǵynan adamdar tek jaqsy, meıirimdi bolýy kerek degen zań jazylmaǵan. Sondyqtan da aýrýhanadaǵy kezek úshin tóbelesetin, on mınýt kútip qalsa, shapyrashtana jónelip, tar ómirdi odan saıyn taryltatyn adamdardy sottaı almaısyń. Tipti sálemińe aýzyn jybyrlatyp, samarqaý amandasatyn áriptesińe de eshteńe deı almaısyń. Aınalańdaǵy barlyq keleńsizdik, soǵys, apat, qaıǵy, ádiletsizdik adamdardyń qatqan júreginen jasalyp jatsa da eshkimge sot joq. Bul qoǵamda adamdar tek Qylmystyq kodekste jazylǵan qylmysy úshin ǵana sottalady. Meıirimsizdigi úshin emes.