Premer-Mınıstr Álıhan Smaıylov mashına jasaý salasyn odan ári damytý máseleleri jóninde keńes ótkizdi, dep habarlaıdy Egemen.kz Úkimettiń resmı saıtyna silteme jasap.
Indýstrııa jáne ınfraqurylymdyq damý vıse-mınıstri Marat Qarabaev, «Qazaqstan mashına jasaýshylar odaǵy» ZTB basqarma tóraǵasy Meıram Pishembaev, «Qazenergokabel» AQ bas dırektory Vladımır Bobrov jáne «Lokomotıv qurastyrý zaýyty» AQ prezıdenti Marat Tileýbaev baıandama jasady.
Mashına jasaý salasynda 3 myńǵa jýyq kásiporyn bar, 115 myń adam jumyspen qamtylǵan. О́ńdeý ónerkásibi óndirisiniń jalpy kóleminde (16,8 trln teńge) mashına jasaýǵa 14%-y tıesili. Salanyń eń iri sektorlarynyń biri — avtomobıl jasaý – 33,1%.
Aldaǵy jyldary elimizde qurastyrylatyn avtomobılderdiń modeldik qataryn keńeıtý, sondaı-aq avtokomponentter (bamperler, oryndyqtar, avtomobıl shynysy, plastıkten jasalǵan bólshekter, shınalar, t. b) óndirisin retke keltirý josparlanyp otyr. Keńes barysynda salanyń ózekti máseleleri de qaraldy.
Máselen, búgingi tańda Qazaqstanda t/j jáne elektrotehnıkalyq mashına jasaý salalarynda akkredıttelgen zerthanalar joq, sonymen qatar kabeldik-ótkizgish ónimder boıynsha ulttyq standartty ázirleý qajet.
Buǵan qosa, aýyl sharýashylyǵy tehnıkasyn shyǵarý salasynda óndiristiń tolyq tizbegin qurý úshin kásiporyndar arasyndaǵy kooperasııany rettegen jón, al jer qoınaýyn paıdalanýshylardyń satyp alý prosesi boıynsha el ishindegi qundylyǵyn arttyrý úshin sharalar qabyldaý qajet. Sonymen qatar salanyń ımportty almastyrý esebinen aıtarlyqtaı ósýge áleýeti bar ekeni atap ótildi, sol sebepti tıisti baǵdarlama sheńberinde 20-dan astam jobany iske asyrý kózdelgen.
Mashına jasaýdy damytýdyń qosymsha sharalary retinde bazalyq óndirister qurý (bolat ımportyn azaıtý) jáne jumys istep turǵan kásiporyndardy shıkizatpen qamtamasyz etý, sondaı-aq О́nerkásipti damytý qoryn qarjylandyrýdy keńeıtý josparlanyp otyr. QR Premer-Mınıstri qysqa merzimde árbir másele boıynsha qajetti sharalardy daıyndaý úshin barlyq aıtylǵan usynystardy pysyqtaýdy tapsyrdy.
«Mashına jasaý salasy – ekonomıkanyń qarqyndy damyp kele jatqan sektory. Importty almastyrý, ásirese, aımaqtyq naryqtarǵa eksportty keńeıtýde orasan zor áleýet bar. Osy oraıda biz atalǵan salanyń serpindi damýyna jaǵdaı jasap, qajetti qoldaý sharalaryn iske asyrýǵa tıispiz», dedi Álıhan Smaıylov.