Byltyr Shymkentte 10 myńnan astam qylmystyq quqyq buzýshylyq tirkeldi, dep habarlaıdy Egemen.kz Polisia.kz saıtyna silteme bere otyryp.
Shymkent qalasy PD-niń bastyǵy Qaırat Dálbekov 2021 jylǵy jumys qorytyndylary boıynsha halyqqa esep berý kezdesýin ótkizdi. Jıynǵa shahar turǵyndary, ardagerler men qoǵam belsenderi qatysyp, ózderin tolǵandyrǵan saýaldar men usynystardy joldady. Kezdesý barysynda ótken jyly qala aýmaǵynda atqarylǵan jumystar men IIM nusqaýymen jańadan qoldanysqa engizilgen «Qorǵaý» baǵdarlamasy jaıynda fılm kórsetildi. Sondaı-aq polısııa general-maıory úshinshi megapolıstegi jalpy krımınaldyq jaǵdaı men bıylǵy jyldyń jedel-qyzmettik jumys nátıjeleri týraly baıandady.
О́z kezeginde Prezıdent Q.Toqaevtyń qylmysqa qarsy kúreste birqatar ındıkatorlardy tapsyrǵanyn atap ótti. Iаǵnı, mal urlyǵy, esirtki bıznesine qarsy kúres, jol-kólik oqıǵalary men aýyr jáne asa aýyr qylmystardyń ashylý deńgeıine toqtaldy.
Byltyr Shymkent qalasy boıynsha 10 611 qylmystyq quqyq buzýshylyq tirkelgenin, bul 2020 jylmen salystyrǵanda 2,5 paıyzǵa az ekendigin málimdedi.
Atap aıtqanda, qala aýmaǵynda tirkelgen urlyqtardyń jalpy sany 12,0 paıyzǵa tómendep, ashylymy 15,8 paıyzǵa artty. Onyń ishinde páter urlyǵy qylmystarynyń sany 6,3 paıyzǵa azaıdy. Internet-alaıaqtyq boıynsha 281 qylmystyq is tirkelip, onyń 34-i sotqa joldanǵan, 181 is tergeýde. Atqarylǵan jumystardyń nátıjesinde, polısııa qyzmetkerleri ınternet-alaıaqtyqpen aınalysqan 5 adamnan turatyn qylmystyq topty quryqtady.
Qoǵam dertine aınalǵan esirtki qylmysy boıynsha ótken jyly 350 quqyq buzýshylyq jaıty anyqtaldy. Jedel-izdestirý is-sharalary nátıjesinde, 24 kúdiktiden quralǵan 5 qylmystyq top quryqtaldy. Osyǵan baılanysty 2021 jyly zańsyz aınalymnan 90 kelige jýyq esirtki zattary tárkilengenin atap ótti.
Budan ózge, Memleket basshysynyń tikeleı tapsyrmasymen engizilgen servıstik polısııa modeliniń mindetterine toqtaldy.
Birinshiden, servıstik polısııa halyqqa qolaıly qyzmet pen qylmystyń aldyn alý jumystaryn jandandyrýǵa arnalǵan. Ekinshiden, tártip saqshylaryn halyqqa jaqyndatady. Úshinshiden, polısııanyń sapaly qyzmet jasaýyn qamtamasyz etedi. Tórtinshiden, estýshi memleket pen jurtqa jaqyn polısııa qaǵıdatyn odan ári damytady. Qala ákiminiń ókimimen «servıstik polısııa» boıynsha vedomstvolyq toptyń quramy men músheleri bekitilip, qazirgi tańda turaqty jumystar atqarylýda, dedi megapolıstiń bas polıseıi.
Sondaı-aq ótken jyldyń ózinde qala aýmaǵynda 435 jól-kólik oqıǵasy tirkelip, saldarynan 76 adam qaza tapty. 400-ge jýyq azamat aýyr dene jaraqatymen emhanaǵa jetkizilgen. Jalpy, jol-kólik oqıǵalarynyń jıi oryn alýyna júrgizýshilerdiń jyldamdyqty shaman tys arttyryp, qarsy jolaqqa shyǵýy, qaýipsizdik beldeýin taqpaı, mas kúıinde tizginge otyrýy sebep. Osy oraıda, IIM-niń nusqaýymen 20 sáýirden bastap megapolıs aýmaǵynda «Qorǵaý» arnaıy baǵdarlamasy iske qosyldy. Qazirgi tańda atalǵan qosymsha departamenttiń Jedel basqarý ortalyǵyna jáne Patrýldik polısııa qyzmetkerleriniń planshetterine qosylǵan. Iаǵnı, planshet arqyly polısııa qyzmetkeri 8 shaqyrym aýmaqtaǵy jol erejesin únemi buzatyn júrgizýshilerdi anyqtaýǵa múmkindik alǵanyn aıtty.
Bas polıseıdiń esebinen soń azamattardyń suraqtary men ótinishterine kezek berildi. Qala turǵyndary men qoǵam belsendileri ashyq mıkrofon aldynda ózekti máselelerin jetkizip, sheshimin tyńdady. Onyń ishinde megapolıs kóshelerindegi jol qaýipsizdigi, ýchaskelik polısııa qyzmeti, ınternet alaıaqtar men esirtki jarnamasyna qatysty birqatar saýaldarǵa jaýap berildi. Atap aıtqanda, Qarataý aýdanynyń turǵyndary mektep kóshelerine jol belgileri men «Sergek» júıesine qosylǵan beınekameralardy ornatýdy surady. Sebebi balalardyń jol-júrý qaýipsizdigi ata-analardy alańdatyp otyrǵanyn jetkizdi.
О́z kezeginde Qaırat Dálbekov IIM-niń tapsyrmasymen aldaǵy ýaqytta qala aýmaǵyna taǵy 800 jańa beınekamera ornatylatynyn, atalǵan aýdan turǵyndarynyń ótinishi eskeriletinin aıtty.
Sondaı-aq «Nursat», «Kún shyǵys» shaǵyn aýdanynyń azamatshalary avtoturaq máselesi jaıynda saýaldaryna jaýap aldy.