Qaraǵandynyń «Saryarqa» hokkeı klýby qatarynan ekinshi ret, óz tarıhynda úshinshi márte el chempıonatynyń bas júldesin jeńip aldy. Jeti oıynǵa jalǵasqan bıylǵy Qazaqstan birinshiliginiń fınaldyq básekesindegi sheshýshi matchta «kenshiler» ujymy óz muzaıdynynda Kókshetaýdyń «Arlanyn» qabyldap, iri eseppen jeńiske jetti.
Irgetasy 2006 jyly qalanǵan qaraǵandylyq «Saryarqa» hokkeı klýby 2009 jylǵa deıin Reseıdiń ártúrli chempıonattarynda óner kórsetip, júldeli oryndardan kórinip júrdi. Máselen, 2006-2007 jylǵy maýsymda Reseıdiń 1 lıgasynda qola júlde jeńip alsa, kelesi jyly jarys jeńimpazy atandy. Al 2009 jyly elimizde erler komandalary arasynda shaıbaly hokkeıden birinshi ulttyq chempıonat ótkizý týraly sheshim qabyldandy. Úsh jyldyń ishinde Reseıde biraz tájirıbe jınaqtaǵan «Saryarqa» el chempıonatynyń alǵashqy maýsymynda-aq qarsylas shaq keltirmeı, bas júldeni oljalady.
Qazaqstandaǵy alǵashqy chempıondyǵynan keıin qaraǵandylyq komanda qaıtadan Reseıdi betke alyp, Joǵary hokkeı lıgasynda óner kórsetýge bel býdy. Jerlesterimiz 10 jylǵa jýyq ýaqyttyń ishinde eki márte Petrov kýbogyna qol jetkizdi. Atap aıtqanda, 2014 jylǵy básekeniń fınalynda Túmenniń «Rýbın» klýbynan alty oıynda 4:2 esebimen basym tússe, araǵa bes jyl salyp 2019 jyly fınalda dál osy «Rýbınmen» kezdesip, bes oıynǵa jalǵasqan matchta 4:1 esebimen jeńiske jetti. Osylaısha, JHL-da táýir nátıje kórsetip kele jatqan «Saryarqa» 2020 jyly pandemııaǵa baılanysty túrli shekteýlerden keıin qaıtadan el birinshiliginde baq synaýǵa májbúr boldy.
Qaraǵandylyq komanda 2021 jyldyń kókteminde ekinshi márte Qazaqstan birinshiliginde top jardy. Alty oıynǵa jalǵasqan fınaldyq básekede «Saryarqa» Kókshetaýdyń «Arlanynan» 4:2 esebimen aılasyn asyryp, jankúıerleriniń qoshemetine bólendi. Bir qyzyǵy, bıylǵy fınalda da eki komandanyń joldary qaıta túıisti. Turaqty birinshilikte «Saryarqa» men «Arlan» byltyrǵydaı birinshi jáne ekinshi oryndy ıelenip, pleı-offqa joldama aldy. Sóıtip, eki ujym da fınalǵa deıin qarsylastaryn qapy qaldyryp, qatarynan ekinshi jyl fınalda qaıta jolyqty. Alty oıynda bir-birin jeńe almaǵan komandalar (3:3) sońǵy sheshýshi oıyndy Qaraǵandyda ótkizdi.
Jetinshi matchtyń alǵashqy shaıbasyn birinshi kezeńniń 15-mınýtynda muzaıdyn ıelerinen Denıs Fedorov soqty. Ekinshi kezeń bastalǵan bette Saıan Danııar «Saryarqanyń» eseptegi basymdyǵyn eseleı tústi – 2:0. Bul ózderiniń fınaldyq básekedegi sońǵy múmkindigi ekenin jaqsy túsingen Kókshetaýdan kelgen jigitter jeńilip jatqandaryna qaramastan, janushyra alǵa umtyldy. Nátıjesinde, ekinshi kezeńniń sońyna deıin olar tarazy basyn teńestirip úlgerdi. Bul goldardyń avtorlary – Aleksandr Evgrafov (33 mınýt) pen Nıkıta Lýkın (37 mınýt). Alaıda ekinshi kezeńniń aıaqtalýyna toǵyz sekýnd qalǵanda Mıhaıl Rahmanov «Saryarqany» taǵy da esepte alǵa shyǵardy – 3:2.
Úshinshi kezeńde de shıelenisti match jalǵasty. Bul rette jergilikti hokkeıshilerdiń asyǵy alshysynan tústi. Bas-aıaǵy 10 mınýttyń ishinde Sergeı Barbashev (49 mınýt) pen Nıkıta Anahovskıı (59 mınýt) taǵy eki ret nysanany dál kózdedi. Qorytyndy esep – 5:2, «Saryarqanyń» paıdasyna.
Osylaısha, úshinshi chempıondyǵyna qol jetkizgen qaraǵandylyq ujym kýbok sany boıynsha Pavlodardyń «Ertisimen» teńesti. Al el birinshiliginiń eń tıtýldy komandasy О́skemenniń «Torpedosy» sanalady. Shyǵys Qazaqstannyń klýby 1992 jyldan bergi chempıonatta 13 márte tuǵyrdyń eń bıik satysynan kóringen. Olar Qazaqstan chempıonatynda eń keıingi ret 2007 jyly dara shyqqan edi. Keıinnen óskemendik komanda da Joǵary hokkeı lıgasynda óner kórsetý týraly sheshim qabyldaǵan bolatyn.
El birinshiliginiń qorytyndysy boıynsha, Ilıa Rýmıansev («Arlan») bıylǵy maýsymnyń eń úzdik qaqpashysy, Edgars Sıksna («Saryarqa») úzdik qorǵaýshy jáne taǵy bir «saryarqalyq» Mıhaıl Rahmanov úzdik shabýylshy atandy. Al «Aqtóbe» klýbynyń oıynshysy Ivan Zınchenko maýsymnyń úzdik jas oıynshysy atalymyna ıe boldy.
Fınaldyq match aıaqtala salysymen hokkeıden Qazaqstan ulttyq quramasyna shaqyrtý alǵan «Saryarqa» jáne «Arlan» klýbynyń oıynshylary elordada jattyǵý jıynyn ótkizip jatqan negizgi quramnyń qataryna qosyldy. Aıta keteıik, jerlesterimiz 13-29 mamyr aralaǵynda Fınlıandııada ótetin joǵary dıvızıonnyń álem chempıonatynda baq synaıdy. Jerlesterimiz «A» tobynda Danııa, Kanada, Germanııa, Shveısarııa, Slovakııa, Italııa jáne Fransııa quramalarymen sheberlik baıqasady. Iýrıı Mıhaılıs shákirtteri alǵashqy oıynyn 14 mamyrda Danııa hokkeıshilerimen ótkizedi.