Pandemııa ýaqytynda jedel járdem qyzmetkerleri «maıdannyń» alǵy shebinen tabylyp, úlken erlik kórsetti. Jaı ýaqytta da adam ómirine arasha bolyp, antyna adal ekendikterin ispen dáleldeýde. Olar barlyq maqtaýǵa laıyq. Osy rette keshe Ekibastuz qalasyndaǵy jedel járdem qyzmetkerlerine páter kiltteri tabystaldy.
Atap aıtsaq, kenshiler shaharyndaǵy 103 oblystyq stansasynyń eki feldsheri baspanaly boldy. Qyzmettik páter sanalsa da, jas mamandar úshin ájeptáýir kómek ekeni anyq.
Byltyr Ekibastuz qalasy ákimdigi jedel járdem qyzmetkerlerine 4 qyzmettik páter úlestirgen-di. Onyń ekeýine jelilik qyzmet brıgadasynyń dárigeri men feldsheri qonystanyp kelse, 2 páter jóndeý jumystaryn qajet etip turǵan edi.
– Bul máseleni 103 oblystyq stansa basshylyǵy óz moınyna aldy. Jóndelgen páterlerdi Ekibastuzdan bes shaqyrym jerde ornalasqan Qarasor aýylynda turatyn eki feldsherge berý týraly sheshim qabyldandy. Endi olar jumysqa kelý úshin uzaq jol júrip áýre bolmaıdy, – deıdi jedel járdem qyzmeti basshysynyń orynbasary Irına Mıshenko.
Esterińizge salsaq, 2016 jyly Ekibastuz jedel járdem qosalqy stansasy oblystyq stansııanyń quramyna kirgen. Búginde munda 125 adam eńbek etýde. Onyń jeteýi – dáriger, 73-i feldsher jáne 34-i júrgizýshi bar. 2021 jyly qosalqy stansada zamanaýı medısınalyq jabdyqtarmen jabdyqtalǵan sanıtarlyq kólik tolyǵymen jańartylǵan.
Pandemııa kezinde Ekibastuz qosalqy stansasynyń medısına qyzmetkerleri joǵary kásibı jáne úılesimdi jumysty kórsetti. Sonymen qatar sońǵy 2 jyl ishinde bólimshede jiti koronarlyq sındromdary men basqa da aýrýlary bar, JKO-dan keıin tasymaldaý kezinde birde-bir ólim-jitim oqıǵasyna jol berilgen joq.