Almaty oblysynda jolaýshylar tasymalyndaǵy ózekti máseleniń biri qoǵamdyq kóliktiń jaı-kúıi edi. Turǵyndar avtobýstardyń eskirgeni men qys aılarynda salonnyń sýyq bolatynyna jıi shaǵymdanatyn. Keıingi úsh jylda oblystaǵy 240 avtobýstyń 113-i jańartyldy. Bul jalpy avtobýs parkiniń 47 paıyzyn quraıdy.
О́tken jyldyń ózinde óńir marshrýttaryna 36 jańa avtobýs shyǵarylǵan. Bul sharalar – jolaýshylar tasymaly salasyndaǵy qordalanǵan problemalardy júıeli túrde sheshýge baǵyttalǵan jumystardyń bir parasy.
Josparly jańartý bastalǵanǵa deıin qoǵamdyq kólik salasyndaǵy jaǵdaı avtobýstardyń tozý deńgeıiniń joǵary bolýyna, kólik qoljetimdiliginiń birkelki emestigine baılanysty kúrdelene túsken. Avtobýs parki sońǵy ret 2018 jyly jańartylǵan, ol Qonaev qalasynda nebári 11 kólikpen shektelgen edi. Bul qarqyndy damyp, aýmaǵy keńeıe túsken óńirdiń qajettiligin tolyq qamtýǵa múmkindik bermedi. Ásirese ishki aýdanaralyq baǵyttar men shalǵaı aýyldyq eldi mekenderde másele aıqyn sezilip, qoǵamdyq kólik kóp jaǵdaıda jalǵyz qatynas quraly bolyp qala berdi.
Máseleniń ózektiligi eskerilip, 2023 jyldan bastap oblysta avtobýs parkin kezeń-kezeńimen jańartý tetigi qalyptastyryldy. Sol jyly tasymaldaýshylar óz qarajaty esebinen 33 avtobýs satyp alsa, odan keıingi jyly 44 avtobýs jańartyldy. Onyń 27-si jeńildetilgen lızıng baǵdarlamasy aıasynda alynǵan. Byltyr taǵy 33 avtobýs jeńildetilgen qarjylyq quraldar arqyly satyp alynyp, iske qosyldy. Bul tásil birrettik satyp alýdan turaqty jańǵyrtý modeline kóshýge jol ashty.
Bul baǵyttaǵy jumys aldaǵy ýaqytta da jalǵasyn tabady. Almaty oblysy Jolaýshylar kóligi jáne avtomobıl joldary basqarmasynyń málimetinshe, bıyl taǵy 31 avtobýsty jańartý josparlanyp otyr. Onyń ishinde 11 avtobýs qańtar aıynda satyp alyndy.
Bıylǵa arnalǵan jospardy qalyptastyrý kezinde áleýmettik júktemesi joǵary marshrýttarǵa, buryn kólik qoljetimdiligi jóninde kúrdeli másele tirkelgen baǵyttarǵa basymdyq berilip otyr. Negizgi maqsat – tozyǵy jetken avtobýs parkiniń úlesin birtindep azaıtyp, marshrýttyq jeliniń turaqty jumysyn qamtamasyz etý.
Avtobýs parkin jańǵyrtý arqyly jolaýshylar tasymaly salasyndaǵy júıeli máseleler sheshimin taýyp, turǵyndardyń qoǵamdyq kólikpen qatynaýyna qolaıly jaǵdaı jasalyp keledi.
Almaty oblysy