«Azamattarǵa arnalǵan úkimet» korporasııasy memlekettik qyzmetterdiń basym bóligin qaǵazsyz qyzmetke aýystyrmaq, dep habarlaıdy Egemen.kz turkystan.kz-ke silteme jasap.
HQKO-da 8 qyzmet boıynsha qaǵaz túrinde beriletin qolhatty qysqartty. Jaqyn arada barlyq memlekettik qyzmet qolhatsyz kórsetiletin bolady.
«Azamattarǵa arnalǵan úkimet» memlekettik korporasııasynyń Basqarma tóraǵasy Súıenish Ábdildınniń aıtýynsha, qaǵazsyz qyzmet kórsetýge kóshý birneshe kezeńmen júzege asyrylady.
«Memlekettik apparatty jalpy sıfrlandyrý jáne bıýrokratııasyzdandyrý aıasynda mıllıondaǵan tonna qaǵazdy tehnologııalar men onlaın-servısterge aýystyrý qajet, biz osy baǵytta jumysty bastap ta kettik. Endi qazaqstandyqtarǵa qujaty daıyn bolǵanda qaı HQKO-ǵa júginý kerektigi jáne ýaqyty kórsetilgen sms-habarlama keledi. HQKO operatoryna klıent qolhattyń elektrondy nusqasyn kórsetse boldy», dedi Súıenish Ábdildın.
Halyqqa qyzmet kórsetý ortalyqtarynyń mamandary qazaqstandyqtarǵa osy 8 qyzmet boıynsha jylyna 6 mln-ǵa jýyq qolhat beredi (bul qolhattardyń jalpy sanynyń 40%-yn quraıdy). Endi klıentter qujattaryn alý kezinde qaǵaz túrindegi qolhatty kórsetý qajettiliginen qutyldy.
Qaǵazdyń 2022 jyly kúrt qymbattap ketkenin eskeretin bolsaq, qaǵaz túrindegi qolhattan bas tartý memlekettik korporasııanyń qaǵazǵa jumsalatyn shyǵyndaryn qysqartýǵa múmkindik beredi.
Qolhat berilmeıtin qyzmetter tizimi:
Qazaqstan Respýblıkasynyń Ulttyq kýálandyrýshy ortalyǵynyń tirkeý kýáligin berý jáne keri qaıtaryp alý;
Qazaqstan Respýblıkasy halqyn turǵylyqty jeri boıynsha tirkeý;
Qazaqstan Respýblıkasy halqyn turǵylyqty jeri boıynsha tirkeýden shyǵarý;
Azamattyq hal aktilerin tirkeý týraly qaıtalama kýálikter nemese anyqtamalar berý;
Sottylyqtyń bolýy nemese bolmaýy týraly anyqtama berý;
Jyljymaıtyn múlikke quqyq belgileıtin qujattyń telnusqasyn berý;
Jyljymaıtyn múlik obektileriniń josparyn (shemasyn) qosalǵanda, tirkeý organy kýálandyrǵan tirkeý isi qujattarynyń kóshirmelerin berý;
Jyljymaıtyn múlik obektileriniń tehnıkalyq pasportynyń telnusqasyn berý.
Aıana Toǵanbek