Grekııanyń Rodos aralynda shahmattyń rapıd jáne blıs túrlerinen uıymdastyrylǵan 2022 jylǵy álem chempıonaty óz máresine jetti. Osydan birer kún buryn 18 jasqa deıingi jastar arasyndaǵy rapıdten álem chempıony atanǵan FIDE sheberi Qazybek Nógerbek taǵy da jahandyq dodada úzdik shyqty. Otandasymyz bul joly blıs shahmat túrinen qarsylastarynan oza shaýyp, álemniń teńdessiz shahmatshysy degen ataqqa ıe boldy.
Qazybek Nógerbektiń bólek, álem chempıonatynda 18 jasqa deıingi qyzdar arasyndaǵy jarysta synǵa túsken 17 jastaǵy otandasymyz, áıelder arasyndaǵy halyqaralyq sheber Nazerke Nurǵalı da top jardy. Al 14 jasqa deıingi uldar arasyndaǵy rapıd jarysynda qola júldeger atanǵan Danııal Sápenov blıs saıysynda kúmis júldege qol jetkizdi.
«Búgin qazaqstandyq shahmatshylar úshin aıtýly kún. Grekııadaǵy álem chempıonatynda sportshylarymyz el qorjynyna úsh altyn, bir kúmis jáne bir qola medal saldy. Qazaqstan shahmat federasııasynyń atynan shahmatshylarymyzdy jáne olardyń jattyqtyrýshylaryn, ata-analaryn tamasha jetistikterimen quttyqtaımyz», dedi Qazaqstan shahmat federasııasynyń atqarýshy dırektory Ánýar Esmaǵambetov.