Aqtóbede kópqabatty úıdiń balkonynan órt shyqty. О́rt sóndirý qyzmeti 60 adamdy evakýasııalady, dep habarlaıdy Egemen.kz Aqtóbe oblystyq Tótenshe jaǵdaılar departamentine silteme jasap.
Aqtóbe qalasy Ábilqaıyr han dańǵylynda ornalasqan 9 qabatty úıdiń balkonynan órt shyqty. Oqıǵa ornyna oblystyq tótenshe jaǵdaılar departamentinen 57 adam 10 tehnıka jumyldyryldy.
«Shaqyrtý túsken soń biz oqıǵa ornyna bes mınýtta jettik. Barlyǵy 60 adam evakýasııalanyp, 10 adam qutqarý satysy arqyly tómen túsirildi. 9 qabatty úıdiń tórtinshi qabatynan bastap órt shyqqan. Tek balkondar jandy. Qazirgi kezde órttiń shyǵý sebebi anyqtalyp jatyr», dedi oblystyq TJD bastyǵy Marǵulan Amanbaev.
Aıta keteıik, órt týraly habarlama saǵat 16:50-de túsip, qyzmetkerler oqıǵa ornyna bes mınýtta jetken. О́rt 17:05-te sóndirilgen.