Tennis Europe uıymy bıyl kúzde Monte-Karloda ótetin Junior Masters týrnırine oraı balǵyn tennısshilerdiń jańartylǵan reıtıngin jarııalady.
QTF baspasóz qyzmetiniń málimeti boıynsha, 14 jasqa deıingi tennısshiler arasynda jerlesimiz Zańǵar Nurlanuly ádettegideı kósh bastap keledi. Onyń enshisinde 520 upaı bar. Jalpyeýropalyq reıtıngte Zańǵar 4-orynda tur. Sondaı-aq Damır Jalǵasbaı men Danıel Tazabekov óz kórsetkishterin jaqsartty. Danıel 37-shi, Damır 39-satyǵa kóterildi. Jýyrda Úndistanda 14 jasqa deıingiler arasynda Azııa/Tynyq muhıt aımaǵy boıynsha ótken álem chempıonatynyń irikteý týrnırinde osy tennısshiler 3-orynǵa ıe bolyp, Qazaqstan jasóspirimder quramasyn tuńǵysh ret álem chempıonatynyń fınaldyq kezeńine shyǵarǵan edi.
Sonymen qatar Halyqaralyq tennıs federasııasy da 18 jasqa deıingi tennısshilerdiń reıtıngin jańartty. Munda úzdik 100 tennısshiniń qatarynda Qazaqstannyń eki ókili bar. Biri – Maksım Batıýtenko (72-oryn), ekinshisi – Arýjan Saǵyndyqova (77).