Keshe fýtboldan bıylǵy Eýropa Chempıondar lıgasynyń fınalyna shyqqan ekinshi komanda belgili boldy.
Anglııanyń «Manchester Sıtı» klýbyn óz alańynda qabyldaǵan Ispanııanyń «Realy» pleı-off kezeńiniń alǵashqy oıyndary sııaqty bul joly da kambek jasap, jankúıerlerin qýanyshqa bóledi. Madrıdtik ujym jartylaı fınaldyń syrt alańda ótken alǵashqy oıynynda 3:4 esebimen jeńilgen bolsa, jaýapty kezdesýde de 0:1 nátıjesimen jeńilip jatqan-dy. Alaıda 90 jáne 90+1 mınýtta Rodrıgo dýbl jasap, eki oıynnyń qorytyndysy boıynsha esepti teńestirdi. Al qosymsha taımda Benzema penaltıden gol soǵyp, komandasyna mańyzdy jeńis syılady – 3:1. «Manchester Sıtıdiń» jalǵyz golyn 73-mınýtta Rııad Mahrez saldy.
Osylaısha, Karlo Anchelottı shákirtteri fınalda «Lıverpýlmen» kezdesetin boldy. Bul – eki ujym arasyndaǵy úshinshi fınal bolmaq. 1980/81 jyly anglııalyq klýb Parıjde 1:0 esebimen jeńiske jetse, 2017/18 jyly Kıevte ıspanııalyqtardyń mereıi ústem boldy – 3:1. Bıylǵy fınal 28 mamyrda Parıjdegi «Stad de Frans» stadıonynda ótedi. Bul joly qaı klýbtyń baǵy janar eken?