Reseılik kásipqoı boksshy Dmıtrıı Bıvol (20-0, 11 KO) keshe AQSh-tyń Las-Vegas qalasyndaǵy áıgili T-Mobile Arena kesheninde ótken boks keshiniń basty jekpe-jeginde álemniń shoqjuldyzy meksıkalyq Saýl «Kanelo» Alvaresti (57-2-2, 39 KO) jeńip, osy jyldyń basty sensasııasyn tirkedi. 12 raýndqa josparlanǵan kezdesýde reseılik boksshy qarsylasynan upaı sanymen basym túsip, jartylaı aýyr salmaqta ózine tıesili WBA Super álem chempıony ataǵyn úshinshi márte sátti qorǵady.
Golovkın-Mýrata jekpe-jeginen keıingi bıylǵy kóktemniń basty aıqasy sanalǵan Kanelo-Bıvol kezdesýinde meksıkalyq boksshy mamandar tarapynan da, kásipqoı boksta jıǵan tájirıbe jaǵynan da negizgi favorıt edi. Sýper orta salmaqta álemniń absolıýtti chempıony atanyp, 2019 jyly jartylaı aýyr salmaqta taǵy bir reseılik Sergeı Kovalevten WBO beldigin tartyp alǵan Alvares qalaısha bul jekpe-jekte favorıt sanalmaıdy?!
Biraq kóp jaǵdaıda álemniń men degen boksshylaryna sharshy alańda statıstıkasy da, jyldar boıy jınaǵan tájirıbesi de kómektese almaı jatatyn kezderdi jıi baıqap, kórip júrmiz. Jekpe-jekke qaı boksshy jaqsy daıyndyqpen keledi, kóbine sol boksshy jeńiske jetetin. Bul joly da solaı boldy. Dmıtrıı Bıvol bul aıqasqa joǵary daıyndyqpen kelgeni birinshi raýndtyń ózinde-aq anyq baıqaldy. Alǵashqy úsh mınýttyqta reseılik boksshy belsendi qımyldap, boıy men qolynyń uzyndyǵy arqasynda araqashyqtyqty únemi djeb soqqysymen ustap otyrdy. Al Kanelo bolsa ádettegideı, agressıvti túrde tez arada araqashyqtyqty qysqartýǵa, hýk soqqysynyń arqasynda qarsylasynyń qorǵanysyn buzyp-jarýǵa, búırekke kóp soqqy jasap, arasynda apperkot soqqy jasaýǵa tyrysty. Meksıkalyqtyń 12 raýnd boıy qaıtalaǵan bar áreketi osy ǵana, basqa túk isteı alǵan joq. Durysy, Bıvol Kaneloǵa artyq qımyl jasatqan joq.
Alǵashqy alty raýndta eki boksshy da kezek-kezek basymdyqqa ıe bolyp, rıngtiń ortasyn ıelenýge tyrysty. Biraq kezdesý orta tusynan aýǵanda Bıvoldyń basymdyǵy baıqala bastady. Kanelo shabýylǵa tek bir-eki soqqymen ǵana shyqsa, Bıvol únemi oǵan jaýap retinde qarsy shabýylda serııaly soqqy jasap otyrdy. Onyń eń utqan jeri de osy – serııaly soqqylary boldy. Jekpe-jek sońynda úsh tóreshi de 115-113 upaımen jeńisti biraýyzdan reseılik boksshyǵa berdi. Kanelo sońǵy úsh chempıondyq raýndta táýekelge baryp, Dmıtrııdi nokaýtqa túsirgisi kelgen-di. Biraq fızıkalyq turǵyda óte jaqsy daıyndyqpen kelgen reseılik boksshy meksıkalyqtyń kez kelgen soqqysynan sytylyp shyǵyp ketti.
Jekpe-jekten keıin sóz alǵan Dmıtrıı Bıvol Kanelony jeńip, Golovkın-Alvares arasyndaǵy úshinshi jekpe-jektiń ótýine kedergi keltirgeni úshin Eddı Hırnnen keshirim surady. Iаǵnı Hırnniń jospary boıynsha, Golovkın sáýirde Mýratany, Kanelo mamyrda Bıvoldy jeńip, kúzde kóptiń tilegi bolǵan trılogııany uıymdastyrmaqshy edi. О́kinishke qaraı, Saýl tapsyrmany oryndaı almady.
Kanelo bul aıqasta jeńilgenin ashyq moıyndap, Dmıtrıı Bıvoldan revansh jekpe-jek surady. О́z kezeginde Bıvol qarymta kezdesýge daıyn ekenin jáne endigi shartty ózi qoıatynyn aıtty. Sóıtip kúzde trılogııany kútken jankúıerler Bıvol-Kanelo revanshyn tamashalaıtyn sııaqty. Al orta salmaqtaǵy eki alyptyń arasyndaǵy úshinshi aıqastyń túıini osymen tarqaǵan sekildi.