Ádilet vıse-mınıstri Alma Muqanova 5 maýsymda ótetin referendým nátıjesi boıynsha oń sheshim qabyldanǵan jaǵdaıda QR Prezıdentiniń ókilettigine birqatar shekteý qoıylatynyn aıtty, dep habarlaıdy Egemen.kz.
«Referendýmǵa shyǵarylyp jatqan konstıtýsııalyq ózgeristerdiń ishinde qoǵamda keńinen talqylaýǵa túsip jatqan máseleniń biri – Prezıdenttiń laýazymyna baılanysty shekteýler. Ol degenimiz, aldymen, Prezıdenttiń jaqyn týystary úshin saıası laýazymdar men kvazımemlekettik sektorda basshylyq laýazymdardy atqarýǵa shekteý qoıylmaq. Ekinshiden, Prezıdenttiń óz ókilettikterin júzege asyrý kezeńinde saıası partııa múshesi bolýyna tyıym salynady», dedi Alma Muqanova Ortalyq kommýnıkasııalar qyzmeti alańynda ótken baspasóz máslıhatynda.
Mınıstr orynbasarynyń aıtýynsha, Konstıtýsııaǵa engiziletin ózgerister 12 bloktan turady.
«Sonymen qatar Memleket basshysynyń aýdan, oblys, shaǵyn qalalar men aýyldyq okrýgterdiń ákimderin saılaý jáne bosatý quqyǵy alynyp tastalady. Kórip otyrǵanyńyzdaı, bul Prezıdent ókilettiliginiń qysqarýy degen sóz. Iаǵnı «sýperprezıdenttik» basqarý úlgisinen bas tartýdy bildiredi», deıdi ol.