Aqtóbede alaıaqtardyń joly bolyp tur. Quqyq qorǵaý organdary tarapynan qanshama qareket jasalǵanymen de alaıaqtar aldaǵandar qatary kóbeıip ketti. Oblystyq ishki ister departamenti baspasóz qyzmetiniń ózi de moıyndaǵandaı, alaıaqtardyń, sońǵy kezderi baǵy janǵan syńaıly.
Mysaly, ústimizdegi jylǵy 27 naýryzda kezekshi bólimge birden úsh zardap shegýshiden alaıaqtyń quryǵyna ilikkeni týraly habar túsken. Úsh zardap shegýshi de Mártók selosynyń turǵyndary. Olardyń senimine kirgen beıtanys áıel «Qazavtojol» JShS-ine jumysqa ornalastyramyn dep aldap, jalpy somasy 102 500 teńgeni úptep ketken. Úsh derek boıynsha da Aqtóbe qalasynyń 27 jasar turǵyny kúdikti bolyp otyr.
Tap sol kúni 19 saǵat 25 mınýtta kezekshi bólimge Embi qalasynyń 26 jasar turǵyny túski saǵat 13.00 saǵatta belgisiz bireýdiń telefon shalyp, onyń avtomobıl utqanyn, syılyqty alý úshin 5 myń birlik salý qajettigin habarlaǵanyn, óziniń termınal arqyly kórsetilgen birlikti aýdarǵanyn jetkizedi. Ońaı olja tabamyn dep aldanyp qalǵanyn kesh túsingen. Sol kúni qalanyń 33 jastaǵy turǵynynan da shaǵym túsken. Sóıtse, odan buryn onsha jaqsy tanys emes jigit 2012 jyly Kirpishti aýdanynan jer telimin alyp beremin dep aldap, 2 myń AQSh dollaryn alǵan.
Budan bir kún buryn kezekshi bólimge 47 jastaǵy áıel adam jolyqqan. Qala turǵyny 2013 jyly mamyr aıynda ózine onsha tanys emes 55 jastaǵy áıel adamnyń «Toıota Karolla» avtomashınasyn satyp alyp beremin dep aldap, 1210 myń teńgesin qaǵyp ketken.
Adaldyqtyń aýylynan alshaqtaǵan alaıaqtar tym ákkilenip alǵany sonshalyq, aldap-arbaýdyń túrli-túrli tásilderin sheber paıdalanady. Adamdardyń senimine tez kirýge daǵdylanǵan. Árıne, buǵan ózimiz de kinálimiz. Qazir olardyń aldaýyna kózi ashyq jastardyń da ózi arbalyp qalýda. «Bul ne degen batpan quıryq, aıdalada jatqan quıryq» dep bas qatyryp jatpaımyz.
Satybaldy SÁÝIRBAI,
«Egemen Qazaqstan».
Aqtóbe oblysy.