Ortalyq saılaý komıssııasynyń tóraǵasy Qýandyq Turǵanqulov keshe Japonııanyń elimizdegi Tótenshe jáne ókiletti elshisi Kamohara Masaıosımen kezdesý ótkizdi. Japondyq tarap bastamashy bolǵan bul kezdesýge, sondaı-aq, Japonııa elshiliginiń úshinshi hatshysy Makı Takası jáne Ortalyq saılaý komıssııasynyń músheleri Marat Sársembaev pen Tatıana Ohlopkova qatysty.
Kezdesý barysynda Qýandyq Turǵanqulov elimizdiń saılaý júıesi týraly jan-jaqty aqparat berdi. «Qazaqstan Respýblıkasyndaǵy saılaýlar týraly» Zań 1995 jyly qabyldanǵanyn tilge tıek etken OSK tóraǵasy sol kezden bastap saılaýlardyń demokratııaly ári halyqaralyq standarttarǵa saı óte bastaǵandyǵymen bólisti. Osy jyldar ishinde árbir saılaý naýqanynan keıin saılaý zańnamasy 13 ret pysyqtalyp, 700-den asa ózgerister engizilgen. Sonyń nátıjesinde elimizdegi ótken barlyq saılaýlar qoǵam tarapynan qoldaýǵa ıe bolyp keledi. Sondaı-aq, tóraǵa OSK Azııalyq saılaýlar organy júıesiniń basshylyq organy quramyna engendigin, Ońtústik-Shyǵys jáne Ortalyq Azııa elderindegi ońdy nátıjelerge den qoıyp otyrǵandyǵyn jetkizdi. «Biz japondyq áriptesterimizben saılaý júıesin damytý jáne jetildirý aıasynda jınaqtalǵan tájirıbemen neǵurlym tıimdi almasýǵa múmkindik beretin yntymaqtastyqtyń damýyna shynaıy qyzyǵýshylyq tanytamyz», dedi OSK tóraǵasy.
Elshi Kamohara Masaıosı óz kezeginde óte qysqa ýaqyt ishinde Qazaqstan demokratııalyq jolǵa aıaq basyp, aıtarlyqtaı tabystarǵa qol jetkizgendigin tilge tıek etti. Al Japonııada saılaý júıesine reforma júrgizý Ekinshi dúnıejúzilik soǵystan keıin qolǵa alynypty. Bul rette Masaıosı óz elinde qala men aýyldarǵa qatysty saılaý jáshikteriniń bólinisi áli de jolǵa qoıylmaı kele jatqanyn jasyrmady. Tipti, byltyr osy eldiń Joǵarǵy soty qalalar men aýyldar arasyndaǵy tepe-teńdik máselesi boıynsha pikir bildirip, onyń konstıtýsııalyq talaptarǵa saı emestigine de nazar aýdartypty. Qazirgi tańda japonııalyq depýtattar osy máselemen aınalysýǵa kiriskeli otyr, dep málimdegen elshi jalpy bul kezdesýdiń basty maqsaty saılaý naýqandaryn uıymdastyrý men ótkizý, saılaý júıesin, saılaý zańnamasyn jáne ony qoldaný praktıkasyn jetildirý aıasyndaǵy Qazaqstannyń tájirıbesimen tanysý ekenin jetkizdi. Elshi budan ári yntymaqtastyqtyń damı túsetinine senim bildirip, Qazaqstannyń Ortalyq saılaý komıssııasynyń jumysyna tabys tiledi. Q.Turǵanqulov sóz reti kelgende bylaı dedi: «Yntymaqtastyqtyń ózara tıimdi, jemisti jáne syndarly sıpaty bizge demokratııalyq saılaýdy uıymdastyrý men ótkizý aıasynda ár elde jınaqtalǵan tájirıbemen tıimdi almasý múmkindigin beredi».
Sondaı-aq, tóraǵa Ortalyq saılaý komıssııasy ózara árekettesýdiń barlyq deńgeıinde tájirıbe men aqparat almasý úshin ashyq jáne halyqaralyq uıymdar men ekijaqty kezdesýler sheńberinde de belsendi baılanystar ornatýǵa daıyn ekendigin jetkizdi. Jáne de Qazaqstan men Japonııa ortalyq saılaý komıssııalary arasynda О́zara túsinistik jáne yntymaqtastyq týraly memorandýmǵa qol qoıý múmkindigin qarastyrýdy da usyna ketti.
Asqar TURAPBAIULY,
«Egemen Qazaqstan».