Qyzylorda qalasynda ótken respýblıkalyq «Injý-Marjan» Ulttyq dástúrli óner baıqaýynda elimizdiń ár óńirinen kelgen 80-nen astam ónerli óren baq synady. Besinshi ret uıymdastyrylǵan bul óner báıgesinde Qaraǵandydan baryp qatysqan Maǵjan jáne Uljan Myńbaevtar tolaıym tabysqa qol jetkizdi.
Naqtyraq aıtqanda, Maǵjan Myńbaev bas júldeni jeńip alsa, Uljan Myńbaeva «Halyq áni» atalymy boıynsha birinshi júlde ıegeri atandy. Eki ónerpaz da Qaraǵandy qalasyndaǵy Kenshiler mádenıet saraıynyń «Arqa áýeni» dástúrli án úıirmesinde dáris alady.
Aıta ketý kerek, «Arqa áýeni» dástúrli án úıirmesi bıyldan bastap jumys isteıdi. Ony Qaırat Baıbosynovtyń shákirti, belgili ánshi, Mádenıet salasynyń úzdigi Qaırat Ábeýov basqarady.
Atalǵan baıqaýda 11 jastaǵy Uljan halyq áni «Gúlderaıymdy» oryndapty. Budan basqa onyń repertýarynda «Týǵan el», «Áselim janym», «Terbeldi tyń dala», «Marjan qyz» jáne «Láılim» syndy ánder bar eken.
– Bala kezimnen dombyra tartýmen jáne án aıtýmen aınalysamyn. Tanymal ánshi bolýdy armandaımyn. Mektepti bitirgennen keıin Qurmanǵazy atyndaǵy konservatorııaǵa túskim keledi, – dep syr aqtardy Uljan.
Al jeńimpaz Maǵjan bolsa, dombyra klasyna úsh jyldan beri baryp júr eken. Al dástúrli án aıtýmen bıylǵy jyldyń qańtar aıynan bastap aınalysady.
Baıqaýda ol «Saıra bulbul» ánin tamyljyta oryndap, qazylar men kórermen qaýymnyń ystyq yqylasyna bólengen.
QARAǴANDY