Elordadaǵy Beıbitshilik jáne kelisim saraıynda bir dáýirdiń mádenı tarıhyn ánmen kestelegen ánshi, kompozıtor, Qazaqstannyń halyq ártisi, Memlekettik syılyqtyń laýreaty Eskendir Hasanǵalıevtiń shyǵarmashylyǵyna arnalǵan «Atameken» atty eske alý keshi ótti. Konsertte sazgerdiń syrly ánderi oryndalyp, el bilmeıtin qyrlarynan estelik aıtyldy.
«Ár ánimdi jazǵan saıyn ánim elge taraı ma, ánsúıer qaýymnyń qulaǵyna jaǵa ma degen oıǵa túsemin. Keıde ózime unasa, halyqqa da unar dep qoıamyn...». Kózi tirisinde osylaı dep tolǵanǵan kompozıtordy júregi áste aldamapty. Sezimin jaryp shyqqan syrly ánderiniń qaı-qaısysy da talǵampaz tyńdarmany – halqynyń kóńilinen shyǵyp, ár týyndysy ánurandaı el aýzynan túsken emes.
Zalǵa ıne shanshyr oryn qaldyrmaı sazger rýhyna taǵzym ete kelgen qalyń qaýym Eskendir Hasanǵalıevtiń erke sezimge toly esti ánderin ánshilermen qosyla shyrqap, konserttiń kórigin qyzdyrdy. Estrada ánshileri Qazaqstannyń halyq ártisi Roza Rymbaevanyń oryndaýyndaǵy «Ádemi-aý», Jeńis Ysqaqova shyrqaǵan «Asyl arman», Gúlnur Orazymbetova aıtqan «Almatynyń almasy», «MuzArt» toby shyrqaǵan «Anaǵa sálem», «Esińe al», Medet Salyqov pen Klara Tólenbaeva tógiltken «Eligim-erkem» jáne taǵy da basqa áýezdi ánder Hasanǵalıevtiń máńgilikke bet burǵan ekinshi ǵumyrynyń bastalǵanyn pash etkendeı.
– Qurmetti halqym! Osy keshke jınalyp, boıyndaǵy baryn halqyna arnaǵan Eskendir Hasanǵalıevti eske alyp, rýhyna taǵzym ete kelgen barshańyzǵa basymdy ıip, zor alǵysymdy bildiremin. Eli barda, ándi júregimen túsiner esti tyńdarmany barda Eskendirdiń esimi máńgi jasaıdy. О́mirden ótkenine bir jyl toldy. Halqynyń súıikti kompozıtoryn saǵynǵanyn kórip erekshe tolqyp otyrmyn. Rahmet sizderge, – dep sazgerdiń artynda qalǵan súıikti jary Darıko Sopyjanqyzy jınalǵan jurtshylyqqa rızashylyǵyn bildirip, keshti uıymdastyrǵan Nur-Sultan qalalyq ákimdigine, qala ákimi Altaı Kólginovke alǵysyn jetkizdi.
Eskendir Hasanǵalıevti eske alǵan keshtiń taǵy bir ereksheligi – konsertte kompozıtordyń uly Birjan men nemeresi Nursultan atasynyń áıgili «Aıym bolyp týdyń ba?» ánin qosyla shyrqap, kórermenniń qoshemetine bólendi. Sahnaǵa alǵash shyqqan Nursultannyń óneri jurtshylyqty tánti etip, ata jolyn qýǵan balanyń bolashaǵy zor úmit kúttiretinin de aıqyn ańǵartty. Konsert halqymyzdyń beıresmı ánuranyna aınalǵan rýhty da qýatty «Atameken» ánimen túıindeldi. Keshke qatysýshylarmen qosyla shyrqaǵan kórermen daýsy sahnadaǵy ánshiler únin kómip ketti. Bul – qazaqtyń birtýar perzenti, rýhty uly, súıikti kompozıtoryna degen halqynyń óshpes, ólmes máńgilik saǵynyshy edi...