Qazaqstan Respýblıkasy Prezıdenti janyndaǵy Ortalyq kommýnıkasııalar qyzmeti Almaty qalasynda óz bólimshesin ashty. Atalmysh qyzmet óziniń alǵashqy baspasóz brıfıngin Qazaqstan halqy Assambleıasy Almaty qalalyq jáne oblystyq ókildikteriniń aldaǵy Qazaqstan halqy Assambleıasy HHI sessııasynyń ázirlik jumystary barysyna arnady.
Qazaqstandaǵy túrik etnomádenı birlestigi basshysynyń orynbasary Qazaqbaı Qasymov, grek ulttyq etnomádenı birlestiginiń basshysy Georgıı Iordanıdı, káris ulttyq etnomádenı birlestigi basshysynyń orynbasary Georgıı Kan, uıǵyr etnomádenı birlestiginiń múshesi Rahılıam Mahpırova qatysqan brıfıngte 18 sáýirde ótetin Qazaqstan halqy assambleıasynyń HHI sessııasyna daıyndyq jaıy men osy kúnge deıin qala men oblys kóleminde atqarylǵan ister qaraldy.
Jýrnalıstermen kezdesken top Qazaqstan halqy Assambleıasynyń tarıhyna qysqasha toqtala kelip, jańa ári balamasyz osy qurylymdy iske asyrý jumystary aımaqtarda kishi assambleıalar qurýdan bastalǵanyn, Qazaqstan halqy Assambleıasy qoǵamdy toptastyrýshy tetikterdiń birine aınalyp, ol shyn máninde ultaralyq kelisimniń qazaqstandyq modelin júzege asyrýdyń mańyzdy tetigi bolǵanyn erekshe atady.
«1995 jyly 16 aqpanda Prezıdent Nursultan Nazarbaev elimizdegi ulttyq mádenı ortalyqtardyń jetekshilerimen kezdesý ótkizdi. Sonda, Elbasy respýblıkadaǵy ultaralyq kelisimdi saqtaý jáne ony odan ári nyǵaıtý úshin elimizde jańa qoǵamdyq ınstıtýt – Prezıdent janyndaǵy Konsýltatıvti-keńesshi organ retinde Qazaqstan halqyn ortaq múddege biriktiretin Assambleıa qurý qajettiligi týyndap otyrǵandyǵyn erekshe atap ótken edi», dedi Georgıı Kan.
Búgingi kúni Qazaqstan halqy Assambleıasy elimizdegi – árbir etnostyń múddesin qorǵaıtyn qoǵamdyq birlestik. Assambleıa kópultty Qazaqstan halqyn toptastyrýshy ınstıtýt retinde qalyptasyp boldy dep esepteýge tolyq negiz bar. Assambleıa Qazaqstan azamattaryn otansúıgishtik rýhta tárbıeleýge, etnostar arasyndaǵy dostyq pen birlikti nyǵaıtý isine ólsheýsiz úlesin qosyp keledi.
«Qazaqstan halqy Asambleıasy ár alýan etnostardy azamattyq turǵyda toptastyrýdyń qýatty quralynyń birine aınaldy. Jalpy alǵanda, óz qyzmetiniń alǵashqy kúnderinen bastap Assambleıa elimizdegi etnostardyń mádenıetiniń qaıta jańǵyrýy men damýyna eleýli úles qosyp keledi. Naýryz meıramy, koreı, nemis mádenıetiniń festıvalderi, tatarlar men bashqurttardyń sabantoıy jalpyhalyqtyq sıpatqa ıe boldy. Dúngender, kúrdter sııaqty, t.b. etnostardyń meıramdary men túrli forýmdary respýblıkalyq deńgeıde dástúrli túrde ótkizilip otyrady», dedi túrik etnomádenı birlestiginiń ókili Qazaqbaı Qasymov.
Assambleıanyń belsendi qyzmetiniń nátıjesinde Qazaqstandaǵy etnostardyń mádenı ómiri jandana tústi. О́ıtkeni, Assambleıa etnostyq toptar arasyndaǵy uıymdastyrý jumystarynyń ortalyǵyna aınaldy. Assambleıa organdaryna memlekettik mártebe berilýine baılanysty etnomádenı birlestikterdiń máseleleri jedel sheshimin taýyp, keıbir ózekti máseleler boıynsha úkimet deńgeıindegi sheshimder qabyldanyp keledi. Assambleıa Keńesiniń sheshimimen etnomádenı birlestikterge qarjylaı jáne uıymdastyrý jumystary boıynsha kómek kórsetý maqsatynda respýblıkalyq qor qurylǵan.
Almaty qalalyq etnomádenı birlestikteriniń keńseleri Demokratııa úıinde jáne respýblıkalyq Dostyq úıinde ornalasqan.
Qanat ESKENDIR,
«Egemen Qazaqstan».
ALMATY.