Búgin, 17 sáýir kúni Astanada Din ister agenttiginiń uıymdastyrýymen «Ortalyq Azııadaǵy ıslamnyń roli» taqyrybynda konferensııa ótti. Bul týraly egemen.kz tilshisi habarlady.
Konferensııaǵa din salasyndaǵy qarym-qatynasty retteý jáne dinı ekstremızmge qarsy turý máselelerimen aınalysatyn Reseı, О́zbekstan, Tájikstan, Qyrǵyzstan, Túrkııa, Egıpet memleketterinen kelgen sarapshylar, memlekettik organdar ókilderi, din jáne dinı senim bostandyǵy máselelerin zertteýshi qazaqstandyq sarapshy-mamandar, ǵalymdar, dintanýshylar, úkimettik emes uıymdar ókilderi qatysty.
Konferensııanyń negizgi maqsaty Islamnyń damýynda aıtarlyqtaı úles qosqan Ortalyq Azııanyń rólin talqylaý boldy. Osyǵan oraı jıynǵa qatysýshylar ıslam dininiń rolin, Qazaqstan men Ortalyq Azııa memleketteriniń mádenı jáne rýhanı turǵydan damýyndaǵy yqpalyn talqylap qana qoımaı, Ortalyq Azııa aımaǵynan shyqqan musylman oıshyldarynyń qalamynan týǵan ǵylymı, ádebı, mádenı jáne rýhanı-ónegelik muralardyń qazirgi kezdegi ekstremıstik ıdeıalardyń taralýyna ıdeologııalyq turǵyda bóget bola alatynyn atap ótti. Máselen, halyqaralyq konferensııada sóz alǵan Qazaqstan musylmandary dinı basqarmasynyń tóraǵasy, Bas múftı Erjan qajy Malǵajyuly óziniń sózinde izgilik pen izettiliktiń, bereke men birliktiń, eki dúnıe baqytynyń bastaýy bolǵan din – Islamnyń qazaq topyraǵyna jetkenine 1250 jyldan asqanyna, al baıtaq dalany mekendegen babalarymyz óz salt-dástúri men bolmysyna barynsha jaqyn dindi VIII ǵasyrda qabyldaǵanyna toqtala kele: «Islam – osyǵan deıin jurtymyzdyń júrer joly, baǵyt-baǵdary, qorǵany, tiregi de bolyp keledi. Asyl dinnen qýat alǵan halqymyz qamyqqanǵa qamqor, ulttar men ulystardy yntymaqqa uıytqan irgeli elge aınaldy» degen oıyn jetkizdi.
Al Reseı Ǵylym akademııasynyń Shyǵystaný ınstıtýtynyń jetekshi ǵylymı qyzmetkeri Farıd Abdýllın búginde ıslamdy álemdik din retinde tereń oqý jáne ıslamdyq aǵartý, ıslamdaǵy bilim salalaryn túbegeıli zertteý úderisi keńinen júrgizilip jatqanyn atap ótti. Onyń aıtýynsha, bul akademııalyq qoǵam – arabtanýshylardy, ıslamtanýshylardy jáne tarıhshylardy ǵana emes, jańa zamannyń ımamdaryn daıarlaıtyn dinı qaıratkerlerdiń basyn da biriktirgen. «Islamnyń álemdik din retindegi eń negizgi artyqshylyqtarynyń biri – onda bilim-ǵylym men senim árqashan, árdaıym maǵyna jaǵynan uqsas uǵym retinde qarastyrylady. Iаǵnı, senim – bilimniń fýnksııasy bolsa, bilim de senimniń fýnksııasy. Demek, bilim men ǵylymǵa umtylý – árbir senim ıesiniń basty mindeti bolýy tıis», dedi sheteldik sarapshy óziniń sózinde.
Láıla Edilqyzy.
Derekkóz: egemen.kz.
Foto: dknews.kz.