Brazılııanyń Kashıas-dý-Sýl qalasynda ótken XHIV jazǵy Sýrdlımpıada oıyndaryna Ulttyq qurama sapynda Jambyl oblysynan 13 sportshy qatysyp, 11 medal ıelengen edi. Aımaq basshysy Nurjan Nurjigitov júldegerlermen kezdesip, sportshylarǵa páter kiltterin tabystady, dep habarlaıdy Egemen.kz oblys ákiminiń baspasóz qyzmetine silteme jasap.
Erkin kúresten 2-oryn ıelengen Ǵabıt Esjanov pen Ǵasyr Turǵynbaıǵa, dzıýdodan 2-oryn alǵan Anna Kramorovaǵa 2 bólmeli páterdiń sertıfıkaty tabystaldy. Al, taekvondodan 3-oryn ıelengen Oljas Rysjanovqa, grek-rım kúresinen 3-oryn alǵan Asan Nurjanǵa, dzıýdodan 3-oryn alǵan Ferıde Kara oglyǵa 1 bólmeli páterdiń sertıfıkattary tapsyryldy.
Sondaı-aq dzıýdo, grek-rım, erkin kúresterinen jáne jeńil atletıka men júzýden túrli oryndardan kóringen sportshylar Aıdos Túgelbaev, Evelına Egemberdıeva, Abzal Dosjanov, Shyńǵyshan Áldıbaev, Iаna Sıbırıakova, Rýslan Raımbekov, Sofıa Zakýtnaıaǵa estelik syılyqtar berildi. Sonymen qatar, jattyqtyrýshylar Ernazar Qonysbaev (erkin kúresten), Aleksandr An (taekvondo), Rınat Ismaılov (grek-rım kúresi), Askar Ýsýbalıevke (júzý) jáne sportshylarǵa Alǵys hattar men arnaıy sertıfıkattar tabystaldy.
Oblys ákimi el namysyn qorǵap, nátıjeli óner kórsetken sportshylardy quttyqtap, rızashylyǵyn jetkizdi. Jattyqtyrýshylarynyń da zor úlesin aıryqsha atap ótti. Sondaı-aq oblystyń sport salasynda atqarylyp jatqan jumystar men oń kórsetkishterge, bul baǵytta Memleket basshysynyń tapsyrmasyna sáıkes aýqymdy qoldaýlar kórsetilip jatqanyna nazar aýdardy.
О́z kezeginde jattyqtyrýshylar men sportshylar yqylas bildirgen oblys basshylyǵyna rızashylyqtaryn aıtyp, arnaıy jataqhana, sport keshenin salý boıynsha usynystaryn alǵa tartty.
Aıta ketsek, XHIV jazǵy Sýrdlımpıada oıyndarynda Qazaqstan Ulttyq quramasynyń 65 oıynshysy sporttyń 9 túrinen el namysyn qorǵady. Jalpy medaldik esepte 73 eldiń arasynda Ulttyq qurama 13-orynǵa turaqtady.