Jetisýda óndiris oryndary kóptep ashylyp, el ekonomıkasyn damytqan ústine damytyp, halyqtyń áleýmettik jaǵdaıyn jaqsartýǵa súbeli úles qosyp otyrǵan aýdannyń biri Jambyl aýdany bolyp sanalady. Bir ǵana mysal retinde «Suńqar Almaty qus fabrıkasy» JShS-in aıtýǵa bolady. 2012 jyly qurylys jumystary bastalǵan óndiris ornynda nebári bir jylda jumyrtqa baǵytyndaǵy taýyqtardy baǵatyn 4 jáne balapandarǵa arnalǵan 1 korpýs salynyp, onda qazirgi tańda 230 000 bas qus baǵylýda. Byltyrǵy jyly bul óndiris orny 9 mln. dana qus óndirisi talabyna saı jumyrtqa ótkizip, ISO standartyna saı sertıfıkat alǵan edi. Sonymen qatar ulttyq bıznes málimeti boıynsha «Suńqar Almaty qus fabrıkasy» JShS TMD-da eń jaqsy agroóndiristik joba bolyp tanyldy. «2013 jylǵy Qazaqstan lıderi» degen qurmetti ataqqa ıe bolyp, Fransııanyń ulttyq óndiriske qatysýshylar assosıasııasynyń «SEIN» altyn medalin alǵany taǵy bar. Aǵymdaǵy jyly qurylys jumystary tolyǵymen aıaqtalady dep josparlanǵan óndiris orny ǵylymı negizde jańa tehnologııa boıynsha qus óndirisi talaptaryna sáıkes salynýda. Jeke veterınarlyq zerthanasy bar keshende endi qosymsha 9 korpýs salynyp, barlyǵy 14 korpýstan turatyn bolady. «Bıznestiń jol kartasy-2020» baǵdarlamasy aıasynda jobanyń jalpy quny 877 mln. teńgege baǵalanǵan. «Suńqar Almaty qus fabrıkasy» JShS 2014 jyly 65 mln. dana jumyrtqa ótkizý úshin qarqyndy jumys júrgizýde. Sol baǵyttan taımaı 2017 jyly 168 mln. dana jumyrtqa óndirýdi josparlaǵan. Onyń nátıjesin ýaqyt kórseter, búginde elimizdegi iri sýpermarketterde osy óndiris ornynyń ónimderi molynan satylýda.
«О́ndiris ornynda qusty tamaqtandyrýdan bastap jumyrtqasyn orap retteýge deıin tolyǵymen avtomattandyrylǵandyqtan 42 adam jumys isteıdi. Qatardaǵy jumyskerlerdiń aılyq jalaqylary 50-70 myń teńge. Bul taza jalaqylary, onyń syrtynda óndiris orny retinde ár jumysshynyń tabys salyǵyn jáne aılyq jalaqysynyń zeınetaqy qoryna tıesili paıyzyn tóleımiz. Árıne, bilikti mamandar 140-150 myń teńge aılyq jalaqy alady. Jumyskerler tolyǵymen arnaıy tapsyryspen tigilgen jumys kıimimen qamtylǵan. Aldaǵy ýaqytta tegin tamaqtandyratyn bolamyz. Taıaý ýaqytta quramajem zaýytyn iske qosamyz. Búgingi tańda biz qus azyǵyn kelisimshartqa sáıkes ózge qus fabrıkasynan satyp alýdamyz. Kún saıyn 25 myń tonna azyq beremiz. Bizge túrli máseleler boıynsha jergilikti bılik jaqsy kómek kórsetip turady. Elektr qýaty men kógildir otyndy óndiris ornyna deıin tartýǵa memleket kómektesti», deıdi «Suńqar Almaty qus fabrıkasy» JShS atqarýshy dırektory Sergeı Asanov.
Qoryta aıtqanda, bul óndiris orny aýyl turǵyndaryn turaqty jumyspen qamtamasyz etip otyr.
Nurbol ÁLDIBAEV,
«Egemen Qazaqstan».
Almaty oblysy,
Jambyl aýdany.