Dúkenderde ǵana emes qala bazarlary men túrli saýda núktelerinde de qarapaıym halyq úshin eń birinshi kezektegi áleýmettik mańyzy bar azyq-túlik taýarlardyń qoljetimdi bolýy qarastyrylýda. Osydan biraz jyl buryn baǵany tıimdi ári birqalypty ustaý maqsatynda arnaıy turaqtandyrý qorlary qurylǵan bolatyn. Semeıde osyǵan oraı turaqtandyrý qorynyń ónimderin saýdalaıtyn taǵy bir saýda orny ashyldy. Ol «Aqshyń» bazarynda ornalasqan. Qala ákimdigi men kásipkerler arasyndaǵy memorandýmnyń arqasynda tutynýshylar esigin aıqara ashqan bul núktedegi taýarlardyń baǵasy kelisimge sáıkes tipti, dúkender men bazardan da birshama arzan. Máselen, qant kelisi 152 teńgeden, qaraqumyq 120 teńgeden, ósimdik maıy 280 teńgeden, kartop, kókónisterdiń barlyq túri 55 teńgeden satylady. Semeı turmaq, qala mańyndaǵy aýyldar men oblys aýdandarynan bazarshylap kelgender arzan baǵamen satyp alý múmkindigine ıe bolǵandaryna dán rıza. Atalmysh saýda núktesiniń ashylýynda «Shyǵys Samǵaý» JShS tóraǵasynyń orynbasary Talǵat Muratov pen kásipkerlik jáne saýda sektorynyń meńgerýshisi Ámına Syzdyqova bul oryndaǵy taýarlar qunynyń jaqyn aralyqta eshqandaı ózgeriske ushyramaıtyndyǵynan habardar etti.
– «Aqshyń» qaladaǵy eń úlken bazar ári ortalyqta ornalasqan, – dedi Ámına Syzdyqova, – sondyqtan da qala turǵyndary ǵana emes, oblys turǵyndarynyń da kelip-ketýine asa qolaıly. Taǵy da aıta keterim, búgin «Iýnost» shaǵyn aýdanynda da turaqtandyrý qorynyń ónimderin saýdalaıtyn osyndaı úsh núkte ashyldy. Sondaı-aq, «Dına» dúkeninde de azyq-túlik ónimderin tómen baǵamen satatyn arnaıy oryn bólindi. Qazir qalada turaqtandyrý qorynyń ónimderin saýdalaıtyn 40-tan astam núkte bar. Osy aptanyń sońyna deıin olardyń sanyn alpysqa deıin jetkizýdi josparlap otyrmyz.
– Biz sııaqty turmysy tómen otbasylaryna jaǵdaı jasap otyrǵan ákimdikke rızamyz, – dedi qala turǵyny Bátıma Baıjumanova – kópbalaly anamyn. Shyny kerek, dollar ósti degen kezde biraz alańdap qalǵanymyz ras. Degenmen, kóńilim ornyna tústi. Myna ashylǵan saýda ornyndaǵy baǵalar maǵan unady.
Qalada baǵanyń negizsiz ósýine jol bermeý úshin aldyn alý sharalary jaqsy júrip jatyr. Sonyń bir dáleli osyndaı áleýmettik dúken, nysandar qatarynyń kóbeıýi.
Raýshan NUǴMANBEKOVA.
SEMEI.