Qazaqstan aýmaǵynda buryn turǵan nemese qaıta kelgen etnostyq qazaqtar endi eGov portaly arqyly qandas mártebesin alýǵa nemese ony uzartýǵa ótinim bere alady. Bul týraly «Ulttyq aqparattyq tehnologııalar» AQ baspasóz qyzmeti habarlady.
Demek eGov portalynyń paıdalanýshysy ózine, sondaı-aq otbasynyń barlyq múshesine atalǵan qyzmetke onlaın tapsyrys bere alady. Qyzmet jeke tulǵalarǵa tegin kórsetiledi. Paıdalanýshylarǵa qoıylatyn mindetti talaptar – Jeke sáıkestendirý nómiri (JSN) men Elektrondy sıfrly qoltańbanyń (ESQ) bolýy.
Bul jańashyldyq Memleket basshysynyń Bıýrokratııadan aryltý jónindegi Jarlyǵy aıasynda júzege asyryldy. Mundaǵy kózdelgen meje – sıfrly transformasııa arqyly memlekettik basqarýdyń barlyq salasyna júıeli reınjınırıng júrgizý.
«Memlekettik qyzmetterdi onlaın formatqa kóshirý boıynsha belsendi jumys istep jatyrmyz. Buryn atalǵan qyzmet HQO men jergilikti atqarýshy organdar arqyly offlaın túrinde kórsetilip kelgen. Endi HQO-ǵa barmaı-aq, qyzmetti Elektrondy úkimet portaly (eGov.kz) arqyly onlaın alýǵa bolady. Bul qyzmettiń azamattar úshin mańyzdylyǵyn túsinip, qyzmetti alý prosesin jeńildettik», dedi «Ulttyq aqparattyq tehnologııalar» AQ basqarma tóraǵasy Rostıslav Konıashkın.
Qyzmetti qoldaný úshin Elektrondy úkimet portalyn paıdalanatyn kez kelgen azamat qajetti qyzmet túrin (qandas mártebesin berý nemese uzartý) tańdaıdy. Tańdalǵan qyzmet túrine sáıkes mártebeni alý úshin Eńbek jáne halyqty áleýmettik qorǵaý mınıstrliginiń aqparattyq júıesi arqyly tekserý júzege asyrylady.
Barlyq mindetti joldy toltyryp, surastyrylǵan qujattardy qosa tirkeý qajet (faıldar pdf nemese jpg formatynda).
Sondaı-aq ótinim bergen kezde paıdalanýshy qandas mártebesin berýge nemese uzartýǵa baılanysty qajettilikti otbasy múshelerine qatysty málimetterdi de toltyra alady. Otbasy músheleriniń sanyna shekteý joq.
Qyzmet kórsetýdiń nátıjesi – qandas kýáligi, jergilikti atqarýshy organnyń qandas mártebesin uzartý týraly sheshimi nemese elektrondy qujat nysanynda paıdalanýshynyń «jeke kabınetine» jiberilgen memlekettik qyzmet kórsetýden dáleldi bas tartýdan baıqalý kerek. Memlekettik qyzmetti kórsetý merzimi – jumys aptasynyń 4 kúni.
Atalǵan qyzmet elimizdiń bas qalasy, Almaty jáne Shymkent qalasy men oblystyq mańyzy bar qalalardyń HQO-lary men jergilikti atqarýshy organdarda qoljetimdi.