Halyqaralyq rezervter ósti

Keshe Ulttyq banktiń Alma­ty­daǵy ǵımaratynda bank tóraǵasy Qaı­rat Kelimbetov ulttyq valıý­ta­nyń turaqtylyǵy men birqatar qarjy máselelerine baılanysty baspasóz máslıhatyn ótkizdi. Bas bankırdiń bergen málimetterine súıensek, 2014 jylǵy naýryzda Ulttyq banktiń halyqaralyq rezervteri ulǵaıyp, jalpy halyqaralyq rezervteri 26,5 mlrd. AQSh dollaryna deıin, ıaǵnı 2,0 paıyzǵa ósken. Jyl basynan bergi bul kórsetkish 7,5 paıyzdy qurap otyr. Ulttyq banktiń taza halyqaralyq rezervteri 0,7 paıyzǵa artyp, 25,7 mıllıard AQSh dollaryn quraǵan. Ishki valıýta naryǵynda valıýtany satyp alý jáne Ulttyq banktegi Úkimettiń shottaryna valıýtanyń kelip túsýi, Úkimettiń syrtqy boryshyna qyzmet kórsetý, Ulttyq qor aktıvterin tolyqtyrý, sondaı-aq bankterdiń Ulttyq banktegi shetel valıýtasyndaǵy korrespondenttik shottaryndaǵy qaldyqtardyń tómendeýimen beıtaraptandyrylǵan. Nátıjesinde taza valıýta qorlary (EAV) 2014 jylǵy naýryzda 1,5 paıyzǵa ulǵaısa, tıisinshe altyndaǵy aktıvter júrgizilgen operasııalar jáne onyń álem naryqtarynda baǵasynyń ósýi saldarynan 1,5 paıyzǵa tómendegen. «2014 jylǵy naýryzda teńgeniń AQSh dollaryna qatysty baǵamy 1 AQSh dol­lary úshin 181,78 ben 184,08 teńge ara­lyǵynda ózgerdi. Aıdyń sońynda teńgeniń  bırjalyq baǵamy  bir aıda 1,1 paıyzǵa nyǵaıyp, bir AQSh dollary úshin 182,06 teńge boldy», deıdi Ulttyq bank tóraǵasy. Jalpy alǵanda, ishki valıýta nary­ǵyn­daǵy operasııalardyń kólemi 2014 jylǵy  aq­panmen salystyrǵanda 15,3 paıyzǵa tó­men­dep, 9,2 mıllıard AQSh dollaryn qura­ǵan. Basqa da málimetterge kóz júgirtsek, azyq-túlik taýarlary naryǵynda 2014 jylǵy naýryzda kóbinese jemister men kókónister birshama qymbattaǵan. Mysalǵa, pııaz – 12,1%, oramjapyraq –  9,0%, kartop – 6,8%, qant – 5,8%, balyq jáne teńiz ónim­deri – 1,8%, kúrish –  1,7%, sút ónimderi – 1,2%, un – 0,9%, nan 0,8% qymbattasa, keri­sinshe jumyrtqanyń baǵasy  – 2,8%, qara­qu­myq jarmasy –  1,5% jáne kúnbaǵys maıy 0,6% tómendegen. Bankterdiń ekonomıkany nesıelen­dirýiniń jalpy kólemi 2014 jylǵy aqpanda 12069,4 mıllıard teńgeni qurap, 6,7 paı­yzǵa ósken. Ulttyq valıýtadaǵy nesıelerdiń kólemi 7940,6 mıllıard teńgege deıin, ıaǵnı 0,3 paıyzǵa ulǵaıyp, shetel valıýtasyndaǵy nesıe kólemi 4128,8 mıllıard teńgege deıin (21,4 paıyzǵa) ósip otyr. Teńgedegi nesıe­lerdiń úles salmaǵy bir aıda 69,9 paıyzdan 65,8 paıyzǵa deıin tómendegen. Qanat ESKENDIR, «Egemen Qazaqstan». ALMATY.