Almaty qalalyq «Shyńǵa órleý» áleýmettik klýbynyń Jetisý aýdandyq bóliminde kórnekti ǵalym, fılosofııa ǵylymdarynyń doktory, Ulttyq ǵylym akademııasynyń akademıgi, KSRO Joǵary mektebiniń eńbek sińirgen qaıratkeri Dosmuhambet Kishibekovpen kezdesý uıymdastyryldy. Ǵasyrǵa jýyq ǵumyrynda Qazaq eliniń basyna túsken biraz náýbetti kózimen kórip, olardan aman ótken abyz qarııanyń urpaqqa aıtar ónegeli estelikteri molynan ekenine eshkimniń de kúmáni bolǵan joq.
San urpaqtyń atasy, ustazdardyń ustazy óziniń 97-ge kelgen jasyna qaramaı, sara kóńilimen, dana kókiregimen-aq ózin qorshaı jáýdirep otyrǵandardyń alty-toǵyz jasar baldyrǵandar ekenin birden baǵdarlap, sol jas deńgeıindegilerdiń túısigine qonymdy dárisin bastap jiberdi. Al ata sóziniń aldynda klýbtyń ustaz tálimgeri Gúlzııa Aýqashova ǵylym ǵana emes, soǵys jáne eńbek ardageriniń qaıtalanbas ǵumyrnamasyn tárbıelenýshilerge baıandap ótken edi.
«Bizdiń halqymyz – álemdegi eń ómirsheń, oıshyl da ozyq halyq. Onyń búkil dúnıetanymy, salty, dástúri, ustanymy, tynys-tirshiligi – tunyp turǵan fılosofııa. Senderdiń osyndaı klýbta ózderińniń ájelerińdeı ustaz-tálimgerlerden tálim alyp jatqandaryńnyń ózi ulttyq sananyń, ulttyq fılosofııanyń jemisi», dedi abyz qarııa. О́z kezekterinde baldyrǵandar da jamyraı suraq qoıysyp, uǵynyqty jaýaptaryn aldy.
Kezdesý sońynda klýb tárbıelenýshileri ózderiniń bolashaqta kim bolǵysy keletinderin, qandaı mamandyqty, kásipti qalaıtyndaryn kezek-kezek oryndarynan turyp aıtyp shyqqan soń, atalarynan bata surady. «Jaýynmen jer kógeredi, batamen er kógeredi» deıdi dana halqymyz. Qyzyr sıpatty qonaǵymyz batasyn «Endi bir jıyrma jyldan keıin sender el men jerdiń bir-bir tulǵasy bolasyńdar», dep túıindedi. Baldyrǵandar bolsa, júzderi bal-bul janyp, atalarymen estelik sýretke tústi.
Gúlnar KENJEǴULQYZY,
Almaty qalalyq «Shyńǵa órleý» áleýmettik klýby
Jetisý bóliminiń meńgerýshisi