Ekibastuz qalasyndaǵy magıstraldy sý qubyrlarynyń 68 paıyzy, jylý jelileriniń 86 paıyzǵa jýyǵy ábden tozǵan. Jyldar jyljyǵan saıyn eskirmese, jańaratyn túri joq. Sonyń saldarynan turǵyndar qysta páterinde búrseńdep, aýrýhananyń esiginen syǵalaýǵa májbúr. Al ákimdiktiń tabaldyryǵyn tozdyryp bolǵan. «Etikshi etikke jarymapty» demekshi, kómirge «kómilgen» óńirdiń ómiri ókinishpen ótip jatyr.
Baıaǵyda oqýshylardyń aıǵaıyna shydap júrgen sabyrly muǵalim «bir kúni men de jarylamyn» degen eken. Shydamnyń da shegi bar. Oblys ákimi Ábilqaıyr Sqaqovtyń ekibastuzdyqtarmen kezdesýinde jergilikti turǵyndar kómek surady. Jylady. Bul – qaqaǵan qańtarda páterinde aıaǵynan syz ótken balanyń jasy. Aıazdy aqpanda paltomen uıyqtaǵan qarııalardyń janaıqaıy. Jeltoqsannyń jeli terezeden gýlep, alaqanyn úrlep sýyǵan shaıyn keseniń túbinde qaldyrǵan jas otbasylardyń jan jarasy.
Energetıkter kóshesi, 73 mekenjaıynda ornalasqan úıdiń turǵyndary sońǵy 20 jylda jylýǵa jarymaı otyrǵandaryn jetkizdi. Kósheniń ataýy Energetıkter dep atalǵannan ne paıda? Jıynda 100 páter ıesiniń atynan sóılegen áje ár qysta aýrýhanaǵa túsetinin, úıden dala jyly ekenin ashyna aıtty. №28 shaǵyn aýdannyń turǵyndary da 1989 jyldan beri murynynan sý aǵyp, búrseńdep keledi. Úsh jyl buryn atalǵan aýdanda qubyrlar jańartylyp, turǵyndar jylýdyń rahatyn sezinemiz dep qýanýy muń eken, ár jylý maýsymy saıyn qubyrlar jarylatyn kórinedi.
Al Drýjba, Jumat Omashev jáne Voınov-ınternasıonalıstov kósheleriniń turǵyndary 10 jyl boıy ortalyqtandyrylǵan jylý júıesine qosyla almaı júrgenderin aıtty. Jaǵalaı ornalasqan 15-ke jýyq úıdiń turǵyndarynyń janaıqaıy sol.
– Injenerlik ıgilikterden maqurym qaldyq. Qalada tursaq ta áli kúnge deıin pesh jaǵamyz. Qysqy maýsymda 20 tonnadaı kómir tutynamyz. Kómirdiń ústinde otyrsaq ta, qara otynnyń baǵasy jyl saıyn qymbattaýda. Jylý elektr stansalarynyń irgesinde turyp, jylýǵa jarymaı otyrǵanymyz ókinishti. Ákimdik jylý jelisin úıdiń aýlasyna deıin jetkizip berse, ári qaraı úıge ózimiz tartyp alatyn edik, – deıdi turǵyndar.
Belgili bolǵandaı, shahardaǵy jylý jelileriniń uzyndyǵy 422,83 shaqyrymdy quraıdy. Onyń basym bóligi «Ekibastuzjylýenergo» JShS-niń ıeliginde (342,622 shaqyrym). Búginde atalǵan mekemeniń esebindegi jylý qubyrlarynyń 85,98 paıyzy tozǵan. О́kinishke qaraı, jyl saıyn jóndelýge tıis kólemniń jartysy ǵana oryndalady. Jylý taratýǵa jaýapty uıym basshylyǵy «tarıf quny tómen, sol sebepti jóndeý jumystaryna qarajat jetpeıdi», dep ózderine shań jýytqysy joq.
Bizdiń jazǵanymyz eki-úsh mysal ǵana. Kún saıyn qala ákiminiń saıtyna kelip túsetin ótinishter qanshama?! Qys bolsyn, jaz bolsyn kommýnaldyq máseleler boıynsha aryzdanatyn azamattar az emes. О́ńirdiń ınjenerlik jeliler júıesi jańǵyrtylmaı, shaǵymdardyń azaıýy ekitalaı. Monoqalalardy damytý jobasy sheńberinde Ekibastuz qalasyna qazynadan qomaqty qarajat qarastyrylǵany belgili. Bul rette, shahardyń kommýnaldyq júıesi jańa keıipke enedi degen senim mol.
Pavlodar oblysy,
Ekibastuz qalasy