Kóliktik tranzıttiń áleýeti artady

Keshe Ortalyq kommýnıkasııalar qyzmetinde Ulttyq kásipkerler palatasynyń Memlekettik satyp alýlar jáne jergilikti qamtý departamenti dırektorynyń orynbasary Aıgúl Qońyrtaeva baspasóz máslıhatyn ótkizdi. Ol shaǵyn jáne orta bıznestiń ıntegrasııalyq úrdisterdegi róli týraly áńgimeledi. Sharaǵa «QTJ» UK» AQ Kor­poratıvtik damý jónindegi bas­­qarýshy dırektory Er­kin Jý­sanbaev pen ulttyq kompa­nııa­nyń Ekonomıkalyq ıntegrasııa departamentiniń dırektory Álııa Jumabaeva da qatysyp, Eýra­zııalyq ekonomıkalyq odaq aıasyn­daǵy temirjol qyzmeti týraly aıtty. Máslıhat spıkerleri eko­nomıkalyq ıntegrasııanyń kásip­kerlerimizge óte tıimdi bolatynyna nazar aýdardy. «Eýrazııalyq ekonomıkalyq odaq bıznesmender úshin tıimdi. Byl­tyrǵy jyly Keden odaǵy elderine eksport aı­tarlyqtaı artty. Atap aıtar bol­saq, transformator 7,4, traktor 5,7, júk kólikteri 3,7 ese kóbeıgen. Eýra­zııalyq ekonomıkalyq odaqqa kirý arqyly otandyq bıznes ókil­deriniń básekelestikke qa­bi­let­tiliginiń artatyndyǵy da má­lim. Sonyń negizinde bizdiń bız­nes álemdik naryq talaptary­na be­­ıim­delýi kerek», dedi A.Qo­ńyr­taeva. Osy arada, odaq aıasynda otandyq bıznes ókilderi 200 mlrd. dollardyń naryǵyna qol jetkizetindigin de aıtyp ótken jón. Bul ǵalamat naryqqa Reseı men Belarýs elderiniń mýnı­sı­paldyq satyp alýlaryna qa­tysý arqyly múmkindik alady. Al bizdiń memlekettik satyp alýlarǵa Keden odaǵynyń elde­ri burynnan qatysyp kele jatyr eken. Áıtse de, satyp alý kezinde ózimizdiń otandyq jab­dyqtaýshylarǵa belgili bir artyq­shylyqtar berilip kelgen. Endi ekonomıkalyq odaq aıasynda biryńǵaı memlekettik satyp alý ortalyǵy jasalǵandyqtan, úsh eldiń de bıznes ókilderi birdeı deńgeıde memlekettik satyp alýǵa qatysatyn bolady. Eýrazııalyq ekonomıkalyq odaq aıasynda temirjol bıletiniń quny qymbattamaıdy. «Eýrazııalyq ekonomıkalyq odaqty qurý kezin­de kólik qatynastaryna qatys­ty kelisimshartta odaq ishinde temir­joldyń tarıfin teńestirý máselesi qarastyrylyp, bir­deı bolsyn delingen edi. Re­seı temirjolynyń qyzmeti biz­den 2-2,5 ese qymbat ekeni málim. Osyny eskerip, biz bul sheshim­ge kelispedik. Sóıtip, ár el óziniń kó­lik qyzmetiniń aqy­syn ózi she­shetin boldy», dedi E.Jý­san­baev. Sondaı-aq ol, Eýrazııalyq ekonomıkalyq odaq kóliktik tran­zıttiń áleýeti men báseke­les­tikti arttyratyndyǵyn da aıtty. Qazaqstan, Reseı jáne Belarýs ınfraqurylymdarynyń shekaralas ýchaskelerinde táýel­siz tasy­maldaýshylarǵa teń­deı múm­­kindik ashý máselesi qaras­tyry­lyp otyrǵanyn da ortaǵa saldy. Atalǵan telimder Qazaqstan men Reseı aýmaqtarynda lokomotıvterge qyzmet kórsetiletin oryndardyń shekarasy retinde anyqtalatyn kórinedi. Sóıtip, tasymaldaýshylar teńdeı jaǵdaıda jumys isteý múmkindikterine ıe bolady eken. Nurbaı ELMURATOV, «Egemen Qazaqstan».