Jasyratyny joq, búginde dýaldi oqytý degen ne, onyń qandaı paıdasy bar ekenin túsinbeı júrgen jandar da joq emes. Dýaldi júıeniń negizi – oqýshyny oqý orny men óndiriste qatar oqytý. Iаǵnı, oqýshy tek kitaptan oqyp-toqı bermeı, óndiriste sol bilimin is-tájirıbe retinde synap kórýi qajet.
Áıtse de, dál qazir tehnıkalyq jáne kásiptik bilim beretin oqý oryndary arasynda osy dýaldi oqytýǵa baılanysty birqatar máseleler bar ekeni jasyryn emes. Mysalyǵa, oqýshyny óz mamandyǵynyń qyr-syryna úıretetin sharýashylyq kásiporyndar dýaldi júıege ótip, oqý oryndarymen birlesip jumys isteýge qanshalyqty qulyqty? Sosyn óndiristik is-tájirıbe sabaqtaryn kim ótkizedi, muǵalimder me, joq, sol kásiporynnyń mamandary ma? Mine, bul jerde elimizdiń Bilim jáne ǵylym mınıstrligi men Eńbek jáne halyqty áleýmettik qorǵaý mınıstrligi birlesip jumys istep, kóp máseleni durys jolǵa qoıa bilýi qajet.
Elbasy Nursultan Nazarbaev «Dýaldi kásiptik bilim berýdi damytýdyń mańyzy zor. Buqaralyq maman kadrlarynyń jetispeýshiligin eńserýge múmkindik beretin zamanaýı qoldanbaly biliktilik ortalyqtary qajet» dep, bul júıeni keńinen engizýge naqty tapsyrmalar júktegen bolatyn. Jaqynda Qulan aýyl sharýashylyǵy kolledjinde osy iske serpin bergen bir ıgilikti tirliktiń kýási boldyq. Buryn bul oqý ornynyń agronomııa mamandyǵy boıynsha bilim alyp jatqan oqýshylary óndiristik is-tájirıbeni túrli sharýashylyqtarda ótkizetin. Jasyratyny joq, kúzdiń, qystyń sýyq kúnderinde oqýshylardyń kabınette kitapqa shuqıǵannan basqa amaly joq edi. Endi, mine, kolledj óz ǵımarattarynyń janynan jylyjaı ashyp, dýaldi júıege qol jetkizip otyr. «О́tken jyly oblystyq bilim basqarmasy bizdiń kolledjge 25 mıllıon teńge bólgen bolatyn. Bul qarjyǵa ınteraktıvti taqta, beınekameralar, tehnıka jáne veterınarlyq laboratorııalyq jabdyqtar alyndy. Jáne 4 mıllıon teńgege 4 sottyq jylyjaı ashtyq. Bul jylyjaı oqýshylarymyzdy dýaldi júıede oqytý úshin óte tıimdi bolyp tur. Agronom mamandyǵynda oqyp jatqan jastar osy keshennen úlken tájirıbe jınaqtaıdy. Bul jalǵan uran, naýqanshyldyq úshin emes, oqýshylardyń biliktiligin kóterý úshin jasalyp otyrǵan sharýa», deıdi bul jóninde kolledj dırektory Jumagúl Búkirova.
Iá, shynynda qazir jylyjaıdyń japyraǵy jaıqalyp, alǵashqy ónim jınalyp jatyr eken. Osy kolledjdiń stýdenti Áıgerim Bolathanova 4 sottyq jerde 4 aıdan beri eńbektenip, mol ónim alýdyń joldaryna túrli zertteý jasaǵandaryn aıtady. «Osy ýaqyt ishinde oqýshylar talaı tájirıbe jasap, kóp nársege qanyqty. Qııardyń qandaı túrin egý kerek, ystyq-sýyqqa tózimdi me, ónimdi qalaı beredi, qandaı topyraqqa otyrǵyzý kerek, mine, osy máselege jastar asqan qyzyǵýshylyq tanytty. Olar osy jylyjaıdan úırengen tájirıbesin sharýashylyqtarda da keńinen paıdalanady degen oıdamyn» deıdi ol.
Jalpy, búginde Jambyl oblysynda 51 kásiptik-tehnıkalyq kolledj bar bolsa, sonyń 11-i 19 mamandyq boıynsha túrli kásiporyndarmen 123 kelisimshart jasasypty. Iаǵnı, dýaldi júıe Jambyl jerinde júzege asa bastady degen sóz.
Oralhan DÁÝIT,
«Egemen Qazaqstan».
Jambyl oblysy.