Balalar jylynyń baldyrǵandarǵa daıyndaǵan syıy mol. Sonyń biri – 1 maýsym Balalardy qorǵaý kúnine oraı keshe Roza Baǵlanova atyndaǵy «Qazaqkonsert» memlekettik konserttik uıymy usynǵan «Jazǵy kıno» áleýmettik jobasynyń saltanatty ashylýy desek, qatelespeımiz. Aıtýly joba aıasynda elordalyq baldyrǵandar «Qazaqstan» ortalyq konsert zalynda jaz aılarynda ótkiziletin kıno kórsetilimderin tegin tamashalaı alady.
«Qazaqkonsert» memlekettik konserttik uıymynyń «Qazaqfılm» AQ jáne Ulttyq kınony qoldaý memlekettik ortalyǵymen birlese uıymdastyrǵan jobasynyń negizgi maqsaty – balalarǵa ónerdiń úzdik týyndylaryn qoljetimdi etý, olardyń boıyna mádenı qundylyqtardy sińirý, adamgershilik hám rýhanı turǵyda damýyna oń yqpalyn tıgizý. Sonyń ishinde ásirese kópbalaly, áleýmettik turǵydan az qamtylǵan otbasylardan shyqqan, erekshe kómekke muqtaj balalar men jasóspirimder, jetimder úıiniń tárbıelenýshilerine barynsha óner merekesin syılaýdy murat tutyp otyr.
– О́skeleń urpaq – bizdiń bolashaǵymyz. Sondyqtan baldyrǵandardyń tálim-tárbıesine, rýhanı bilimine basa mán berip, bar jaqsylyǵymyzdy balalarǵa arnaýymyz kerek. Memleket basshysy Qasym-Jomart Kemeluly 2022 jyldy «Balalar jyly» dep jarııalap, óskeleń urpaqtyń baqytty balalyq shaǵy – bizdiń jalpyulttyq mindetimiz dep atap ótken bolatyn. Biz de osy úndeýge úlesimizdi qosyp, osyndaı aýqymdy jobany qolǵa aldyq. Joba jaz boıy jalǵasady. Budan bólek, balalarǵa arnalǵan is-sharalar aldaǵy ýaqytta Qazaqkonsert usynatyn «Balalar fılarmonııasy» degen kópsalaly jobaǵa ulasady, dep atap ótti «Qazaqkonsert» memlekettik konserttik uıymynyń basshysy Aqtoty Raıymqulova.
Aqtoty Rahmetollaqyzy aıtyp ótkendeı, jan jadyratar «Jazǵy kıno» áleýmettik jobasy aıasynda balalarǵa «Kúltegin», «Muzbalaq», «Er Tóstik jáne aıdahar», «Kenje qyz» anımasııalyq týyndylarmen birge sondaı-aq «Paralımpıes», «Vremıa patrıotov», «Bokser», «Kanıkýly offlaın» jáne taǵy da basqa otandyq ozyq týyndylar, kórkem, tarıhı kıno fılmder tegin kórsetiledi. Aýqymdy is-shara elimizdiń eń úlken «Qazaqstan» kıno-konserttik zalynda ótedi. Baldyrǵandar jaz boıy ónerdiń ozyq týyndylarymen sýsyndap, rýhanı bilimin baıytatyn bolady.
«Jazǵy kıno» jarqyn jobasynyń saltanatty ashylý rásimi baldyrǵandardyń esinde uzaq ýaqyt saqtalary sózsiz. О́ıtkeni bul kúni balalarǵa bar qazaqtyń oljasyna aınalǵan ataqty rejısser Abdolla Qarsaqbaevtyń «Meniń atym – Qoja» kınotýyndysy kórsetildi. Is-sharaǵa kelgen baldyrǵandar fılmde basty róldi somdaǵan akter, Qazaqstannyń eńbek sińirgen qaıratkeri Nurlan Sanjarmen júzdesip, suhbattasý múmkindigine ıe boldy. Buǵan qosa, kishkentaı kórermender arnaıy merekelik konsertti tamashalap, «Qazaqstan» Ortalyq konsert zaly boıynsha ekskýrsııaǵa qatysty.
Sonymen qatar balalardy ónerge baýlý maqsatynda bul kúni sýret óneri men gıperrealıstik músin jasaý baǵyty boıynsha belgili sýretshi, Qazaqstannyń eńbek sińirgen qaıratkeri Gúlmıra Telǵozıeva men tanymal músinshi Aıdos Esmaǵambetov sheberlik sabaqtaryn ótkizip, aıtýly joba aıasynda jas sýretshi Meıirim Shymyrbektiń «Ǵajap álem» atty erekshe kórmesi de merekede bas qosqan balǵyndardyń meıramyna usynylǵan tamasha tartý boldy.
Sýretshi, gıperrealıst-músinshi, «100 jańa esim» jobasynyń jeńimpazy, «Mádenıet salasynyń úzdigi» Aıdos Esmaǵambetovtiń jumystary da kórme tórinen oryn alyp, músinshi ótkizgen sheberlik sabaqtary baldyrǵandardyń taǵy bir tynysyn ashqandaı. Aıdos jan bitirgen Abylaı han, Abaı Qunanbaıuly, Barak Obama, Nursultan Nazarbaev, Roza Baǵlanova syndy el men álem tarıhyndaǵy kórnekti tulǵalardyń aınytpaı jasalǵan sılıkondy bodandyq músinderi ónerge qyzyǵatyn talaı balǵyn jastyń kókeıindegi kóp suraqqa jaýap berip, armanyna bir taban jaqyndata túskeni anyq.
– Árıne, búgingi sheberlik sabaǵyma qatysýshylar erekshe top. Olar – álemi kirshiksiz tap-taza balalar. Suraqtary da sondaı shynaıy. Elimizde asa keń qanat jaıa qoımaǵan aıtýly óner túrine degen qyzyǵýshylyqtary da aıryqsha. Balalarmen áńgimelesip, olardyń ańǵal da adal, biraq sonshalyqty shynaıy suraqtaryna jaýap berip ózim de bir jasap qaldym. Al sheberlik sabaqqa kelsek, álbette sanaýly ǵana mınýtta músin jasaýdyń qyr-syryna tolyqtaı qanyqtyrý múmkin emes. Biraq barynsha bul tamasha ónerdiń álippesin uǵyndyrýǵa tyrystym, shyǵarmashylyq qupııalarymmen bólisip, balalardyń ózderine tájirıbe de jasap kórdim. Olardyń erekshe emosııalaryn kórip sheberlik sabaǵym balalar kóńilinen shyqty ǵoı dep túıdim, dep áserimen bólisti tarıhı tulǵalarǵa jan bitirip júrgen jas talant Aıdos Esmaǵambetov.
Dál qazir jyr alyby – Jambyl Jabaevtyń músinin jasap jatqan Aıdostyń bolashaqqa baǵyttalǵan josparlary da aýqymdy. Sonyń biri – músin ónerine qyzyǵatyn talantty balalardyń basyn qosyp, óziniń jeke sheberhanasyn ashyp, ónerdiń osy bir erekshe túrin elimizde keńinen nasıhattap, jan-jaqty damytý eken. «Ol qýanyshty kúnniń de aýyly alys emes» deıdi ózi nyq senimmen. Aıdos syndy talantty talaı janǵa tyń ıdeıa syılap, talaı jas órenniń tanymyna tóńkeris jasaǵan aıtýly jobanyń bolashaǵy laıym jarqyn bolsyn deıik, endeshe. «Jazǵy kınonyń» balalarǵa bereri men bolashaqqa seber dáni jemisti bolǵaı.