Qazaqstanda sý resýrstaryna qatysty máselelerdiń sheshimin ǵylymı turǵydan qamtamasyz etý maqsatynda salalyq ǵylymı-zertteý taldaý ortalyǵy ashylady. Bul týraly Ekologııa, geologııa jáne tabıǵı resýrstar vıse-mınıstri Serik Qojanııazov habarlady, dep jazady Egemen.kz.
«Úkimet sý resýrstaryn basqarýǵa qatysty birneshe shara qabyldap jatyr. Birinshi, transshekaralyq sý resýrstaryn paıdalanýda kórshilermen memleketaralyq sý qatynastaryn qurý kezinde halyqaralyq sý quqyǵy qaǵıdattaryn barynsha iske qosý qajettigi. Ekinshisi sýǵa degen suranys artqan jaǵdaıda tapshylyqty joıýǵa qatysty. Iаǵnı qolda bar sý resýrstarynyń áleýetin saqtap, olardy ıgerýde ıntegrasııalanǵan basqarý praktıkasyn jaqsartý. Sonymen qosa halyqty, sý júıeleri men ekonomıka salalaryn sýmen teńgerimdi qamtamasyz etýge mán berilip jatyr», dedi Serik Qojahmetov «ECOJER» II halyqaralyq ekologııalyq kongresi barysynda.
Onyń aıtýynsha, sý resýrstaryn qorǵaý, baqylaý jáne paıdalanýda basseındik ınspeksııanyń qyzmetin kúsheıtý qajet. Sebebi búginde basseındik ınspeksııa qyzmetkerleriniń júktemesi joǵary bolýyna baılanysty sý qoryn qorǵaýda baqylaý álsiregen.
«Joǵaryda atalǵan sý resýrstaryna qatysty máselelerdiń sheshimin ǵylymı turǵydan qamtamasyz etý úshin «Qazaq Sý sharýashylyǵy» ǵylymı-zertteý ınstıtýtynyń bazasynda sý resýrstary men sý sharýashylyǵy problemalary jónindegi salalyq ǵylymı-zertteý taldaý ortalyǵyn ashý josparlanyp jatyr. Maqsat – Sý resýrstary komıteti men basseındik ınspeksııany nyǵaıtý», dedi ol.