Atyraý oblysynyń ákimi Serik Shápkenov Izraıl Respýblıkasynan tájirıbe almasý maqsatymen kelgen dárigerlerdi qabyldady, dep habarlaıdy Egemen.kz oblys ákiminiń baspasóz qyzmetine silteme jasap.
31-shi mamyrda professor Vadım Kapýller men Saıd Ibragım oblystyq balalar aýrýhanasynda, oblystyq onkologııa dıspanseriniń bazasynda professor Rafael Mıller, Maksım Sokolov jáne Lev Gýrevıch jergilikti mamandarǵa sheberlik saǵatyn ótkizdi.
Aıta ketsek, atalǵan sheberlik saǵattary 5-shi maýsymǵa deıin jalǵasady.
Sheteldik mamandar jergilikti dárigerlermen birlesip joǵarǵy tehnologııalyq operasııa jasap, turǵyndarǵa tegin keńes berýdi josparlap otyr.
«Adam balasy úshin birinshi baılyq – densaýlyq. Turǵyndar úshin sapaly medısına qyzmetteri qoljetimdi bolýy tıis. Bul jolda atqaratyn jumystar barshylyq. Máselen, jergilikti mamandardyń bilimin shyńdaý, salaǵa bilikti mamandardy tartý, zamanaýı tehnologııalarmen qamtamasyz etý sharalary arta beredi. Osy joly josparlanǵan shara aıasynda atyraýlyq aq halattylar qajetti aqparat alyp, tájirıbe jınaıdy dep úmittenemin», dedi S.Shápkenov.
Aıta ketsek, jalpy oqý baǵdarlamasy aıasynda oblys boıynsha 1 000-ǵa jýyq medısına qyzmetkerin oqytý máselesi kún tártibinde tur.
Buǵan deıin 17-21 mamyr aralyǵynda Atyraý oblystyq perınataldyq ortalyǵynda Izraılden kelgen professor Ilıa Rozınniń ótkizgen semınaryna qala jáne aýdandardan 40 maman qatysyp, onyń 34-i sertıfıkat alǵan edi.