Energetıka mınıstri Bolat Aqsholaqovtyń aıtýynsha, 2025 jylǵa deıin Qazaqstanda 19 sý elektr stansasy salynady, dep habarlaıdy Egemen.kz.
«Qazir respýblıkada belgilengen qýaty 2065 MVt bolatyn 136 jańartylatyn energııa kóziniń obektisi jumys isteıdi. Onyń ishinde qýaty 684 MVt bolatyn 40 jel elektr nysany, 1093 MVt elektr óndiretin 51 kún elektr nysany, jıyntyq qýaty 280 MVt bolatyn 40 sý elektr nysany, 8 MVt energııa óndiretin 5 bıoelektrostansııa bar. 2021 jyly jalpy qýaty 393 MVt bolatyn 19 nysan paıdalanýǵa berildi. 2022 jylǵy 1 toqsannyń qorytyndysy boıynsha jańartylatyn energetıka obektileri óndirgen elektr qýatynyń kólemi - 933,07 mln kVt/s», dep jaýap berdi mınıstr depýtattyq saýalǵa.
Onyń jaýabyna qaraǵanda, 2025 jylǵa deıin qýaty 1074 MVt bolatyn 53 jańartylatyn energııa kóziniń jobasyn paıdalanýǵa berý josparlanǵan. Onyń ishinde qýaty 129,77 MVt bolatyn 19 sý elektr stansııasyn, 812,39 MVt qýat ónidertin 23 jel elektr stansııasyn, 116,95 MVt energııa shyǵaratyn 7 kún elektr stansııasyn, 15,35 MVt energııa beretin 4 bıoelektr stansııasyn salý kózdelgen.
«Atalǵan jobalardy iske asyrý sheńberinde shamamen 600 mlrd teńge ınvestısııa tartylady. Sonyń arqasynda qosymsha 3,5 mlrd kVt/saǵ jasyl energııa óndirip, 6 000 ýaqytsha jáne 600 turaqty jumys oryndaryn qurýǵa bolady. Bıyl jalpy qýaty 290,6 MVt bolatyn jańartylatyn energııa kóziniń 10 obektisin iske asyrý josparlanyp otyr», dep qosty mınıstr.