5 maýsymda Konstıtýsııaǵa ózgerister men tolyqtyrýlardy qabyldaý máselesi boıynsha respýblıkalyq referendým ótkiziledi. Erteń, 4 maýsymda saǵat 00:00-de referendým aldyndaǵy úgit júrgizý aıaqtalady, dep habarlaıdy Egemen.kz Bas prokýratýra baspasóz qyzmetine silteme jasap.
«Bul úgitke, sonyń ishinde qoǵamdyq pikirge suraý salý nátıjelerin nemese referendým nátıjeleri boljamdaryn jarııalaýmen ushtasqanǵa referendým ótkiziletin kúnniń aldyndaǵy kúni jáne ol ótkiziletin kúni, ıaǵnı 4 jáne 5 maýsymda tyıym salynady (Konstıtýsııalyq zańnyń 7-babynyń 4-tarmaǵy)», delingen habarlamada.
Osy kúnderi úgit júrgizilgen jaǵdaıda ÁQBtK-nyń 102-baby boıynsha jaýapqa tartylatyny aıtylǵan.
«Eki nemese odan da kóp ret ne basqa bireý úshin daýys berý nemese ýchaskelik referendým komıssııasy múshesiniń azamattarǵa basqa adamdar úshin daýys berýge múmkindik berý maqsatynda daýys berýge arnalǵan bıýlletenderdi berý ÁQBtK-niń 108 jáne 110-baptary boıynsha jaýaptylyqqa ákep soǵatynyna da nazar aýdaramyz. Konstıtýsııaǵa (83-bap) sáıkes prokýratýra organdary referendýmǵa daıyndyq pen ony ótkizýdiń barlyq satylarynda zańdylyqtyń saqtalýyna joǵary qadaǵalaýdy qamtamasyz etedi», delingen habarlamada.
Bas prokýratýra zańdylyqty qamtamasyz etý jáne quqyq buzýdyń aldyn alý maqsatynda azamattardy, qoǵamdyq birlestikter men buqaralyq aqparat quraldaryn qoldanystaǵy zańnamany qatań saqtaýǵa shaqyrdy.