Ústel tennısinen Qazaqstan qurama komandasy Almatydaǵy Ortalyq Azııa irikteý týrnıriniń fınalyna shyǵyp, jasóspirimder arasyndaǵy Azııa chempıonatyna joldama aldy, dep habarlaıdy Egemen.kz Olympic.kz-ke silteme jasap.
Irikteý týrnırinde Iran, Qyrǵyzstan, Tájikstan, Túrikmenstan, О́zbekstan, Qazaqstan quramalary aldymen kishi toptarda, sodan keıin jartylaı fınalda synǵa tústi. Úzdik nátıjeni Iran men Qazaqstan komandalary kórsetti. Búgin bul eki komanda birinshi oryn úshin ózara oınaıdy.
Túrkimenstan men О́zbekstan quramalary qola júldeni sarapqa salady.
Qyzdar arasynda chempıon kýbogyna Qazaqstan men О́zbekstan quramalary talassa, 3 oryn úshin Iran men Qyrǵyzstan sportshylary baq synaıdy.
Osylaısha, qurlyqtyq jasóspirimder dodasynda bizdiń Ortalyq Azııa aımaǵynan Qazaqstan (uldar men qyzdar), Iran (uldar) jáne О́zbekstan (qyzdar) komandalary jarys jolyna shyǵady.
Eske salsaq, irikteý týrnırinde bizdiń elimizdiń namysyn Alan Qurmanǵalıev, Eskendir Harkı, Sanjar Jubanov, Saǵantaı Qurmambaev, Sarvınoz Mırkadırova, Angelına Romanovskaıa, Ánel Baqyt, Alısa Svıgýn qorǵaýda.