Búgin Jambyl oblysynyń ákimi Nurjan Nurjigitov otbasymen birge Taraz qalasyndaǵy №53 mektepte ornalasqan №50 saılaý ýchaskesine baryp, jalpyhalyqtyq referendýmǵa daýys berdi. Jalpy oblys boıynsha barlyǵy 492 saılaý ýchaskesi qurylyp, qazirgi kezde kestege sáıkes jumys atqarýda, dep habarlaıdy Egemen.kz.
№50 saılaý ýchaskesiniń saılaýshylar tiziminde 2779 saılaýshy tirkelgen. Onyń ishinde 9 múmkindigi shekteýli azamat, 5 kózi nashar kóretinder, 3 estý qabileti nashar jáne 1 tirek-qımyl apparaty buzylǵan azamattar bar.
Referendým komıssııasynyń tóraıymy Elmıra Qoılybaevanyń aıtýynsha, atalǵan azamattarǵa daýys berý úshin arnaıy múmkindikter qarastyrylǵan.
«Qazirgi tańda 5 azamat úıden daýys berýge ótinish berdi. Soǵys ardageri Mútálip Erejepbaev pen 4 eńbek ardageri saılaýshylar tizimine tirkelgen. Saılaýshylar tańerteńnen bastap saılaýǵa belsene atsalysýda», deıdi Elmıra Qoılybaeva.