Balalardyń qaýipsiz ári kóńildi demalysyn uıymdastyrý maqsatynda qalalyq ákimdik mamandary keshendi jospar quryp otyr. О́ńirlik kommýnıkasııalar alańyndaǵy brıfıngte Almaty qalasy bilim basqarmasy basshysynyń orynbasary Qaırat Jumanov jáne «Jastar saıasatyn damytý» memlekettik qorynyń basshysy Alma Aýǵanbaeva atap ótkendeı jazǵy kanıkýl balalar úshin mazmundy ári qaýipsiz ortada ótýge tıis.
Balalar jylyna oraı «Almaty balalarynyń jazy – úlken armanǵa jasalǵan shaǵyn qadam!» tujyrymdamasy qabyldanyp, mektepter janyndaǵy jazǵy lager jumysyna erekshe mán berilýde. Balalar men jasóspirimderdiń qadaǵalaýsyz, baqylaýsyz qalýyna jol bermeý ata-analardyń ǵana emes, barlyq orta bilim berý uıymdary mamandarynyń jaýapkershiliginde. Osy oraıda jazǵy mektepter jumysy oqýshylar bilimindegi olqylyqtardy toltyrýǵa yqpal etedi. Úzdiksiz bilim berý júıesi balalar men jasóspirimderdiń damýy, tárbıesi men densaýlyǵyn nyǵaıtýda, kelesi oqý jylyna sergek qaraýyna yqpal etetin bolsa, balalardyń jaraqat alýyna, quqyq buzýshylyqtarǵa jol bermeýge pedagogter ǵana emes, tıisti organ mamandary da jol bermeýge tyrysady. Pedagogter balalarmen kóshe, jol jáne sýdan da qaýip bar ekenin eskere otyryp, qaýipsiz júris-turys daǵdylaryn jetildirý, órt qaýipsizdigi erejelerin saqtaý, balalardyń jol-kólik oqıǵalarynda jaraqat alýynyń aldyn alý, sondaı-aq oqys oqıǵalar kezinde alǵashqy medısınalyq kómek kórsetý jumystaryna erekshe kóńil bólýde. Bul kanıkýl balalardyń esinde jat ádetterden ada, adamgershilik pen rýhanııatqa erekshe kóńil bóletin kezeń retinde qalýǵa tıis.
Jazǵy mektepte oqytý sabaqtarynan basqa, dene shynyqtyrý, qozǵalys oıyndary, fleshmobtar ótip, 26 mamyr men 17 maýsym aralyǵyndaǵy lagerge 1-8 synyp oqýshylary barady. Al 7-13 jas aralyǵyndaǵy oqýshylardyń qatysý merzimi: maýsym aıy men 27 tamyz aralyǵy. Osy oraıda bilim berý uıymdarynda barlyǵy 1 150 úıirme, atap aıtqanda sport seksııalary, klýbtar, stýdııalar, mektep kitaphanalaryndaǵy oqý úıirmeler jumys isteıdi. Oqýshylar saraıy jáne 6 oqýshylar úıinde, 44 jekemenshik qosymsha bilim berý uıymdarynda 1 200-ge jýyq úıirme men seksııa jumysy jandansa, balalar qalaishilik jáne qala syrtyndaǵy jazǵy lagerlerge bıýdjet qarajaty, sondaı-aq kommersııalyq negizde baryp demalý múmkindigi qarastyrylǵan. Saýyqtyrý demalysyna, eń aldymen, halyqtyń áleýmettik osal sanatyndaǵy balalar qamtylady.
Al bıyl úlken ómirge qadam basqaly otyrǵan túlekter úshin birqatar eskertý bar. Olarǵa mektep bitirý kýáligi 16-17 maýsymda saltanatty jaǵdaıda tabys etiledi. Osy oraıda kúndizgi mezgilde mektep qabyrǵasynda pedagogıkalyq ujymnyń, ata-analardyń, eńbek ardagerleri, qamqorshylyq keńes músheleriniń qatysýymen ótetin ıgi dástúr qalyptasqan. Túlekterdiń qaıyrymdylyq bastamalarynyń qatarynda «Mektepke kitap syıla», áleýmettik osal otbasylar men balalarǵa kómek kórsetý maqsatynda «Meıirimdi júrekten balalarǵa», aǵash egý boıynsha «Mektepke syı», «Týǵan jerge taǵzym» aksııalarynyń mańyzdy ekenin aıta ketken abzal.
Pedagogıkalyq ádepti saqtaý, sybaılas jemqorlyqqa qarsy jáne quqyq buzýshylyqtardyń aldyn alý maqsatynda mektep bitirý is-sharalaryna daıyndyq kezinde bitirýshilerdiń ata-analarymen kıim-keshekke qarajat jumsaýdyń orynsyzdyǵyna baılanysty týraly túsindirý jumystary júrgizilip, merekelik dastarqan uıymdastyrý, agenttikterdi shaqyrý, avtokólik jaldaý, qala boıynsha ekskýrsııalar ótkizý, ákimshilik pen muǵalimderge syılyqqa qarajat jınaýǵa qatań eskertý jasalyp otyr.
ALMATY