Elimizde ashylǵan úsh jańa oblystyń biri – Abaı oblysy. Prezıdent Qasym-Jomart Toqaev Joldaýynda «Abaı oblysyn qurýdy usynamyn» degende, semeılikterdiń tóbesi kókke jetken edi. Al búgin Prezıdent Jarlyǵy kúshine enip, Semeı resmı túrde Abaı oblysynyń ortalyǵy boldy.
Osynaý qýanyshty sátti semeılikter uzaq kútti. Áıtpese, tarıh tamyry tereńde jatqan kóne shahar tozyp bara jatqan edi. Áleýmettik ál-aýqaty da kóńil qýanta qoımaıtyn. Ol týraly Prezıdent bıylǵy Joldaýynda da ashyq aıtqan bolatyn. Bertinde, Abaı oblysy qurylatyndyǵy belgili bolǵanda, Semeıdiń ál-aýqaty ońalyp keterine kúmánmen qaraǵan azamattar da boldy. Sebebi, jańa qurylatyn oblysta óndiris oshaqtary joq degendi alǵa tartty. Alaıda, Abaı oblysy tórt túlikke óte qolaıly. 1997-jyldarǵa deıin Semeıde et kombınaty, teri-bylǵary kombınaty, toqyma fabrıkasy sekildi alpaýyt kásiporyndar bolǵany belgili. Munyń bárin kásipker azamattar qaıta qalpyna keltirýi bek múmkin.
Ekinshiden, búgingi Abaı oblysy – etno-týrızmdi, tarıhı-mádenı týrızmdi dóńgeletýge taptyrmas óńir. Atap aıtsaq, Abaı aýdanynda ǵana Abaı-Shákárim kesenesi, Abaıdyń qystaýy, Aqshoqydaǵy Qunanbaı áýletiniń qorymy, Qońyr áýlıe, beride Muhtar Áýezovtiń týǵan aýyly – Bórili, taǵysyn taǵy... Tarıhı mekender Abaı oblysyna qarasty Kókpekti aýdanynda qanshama?! Qazaq jerindegi alǵashqy dala kitaphanasy da Kókpektiniń jerinen tabylǵan. Osynaý óńirlerge týrıstik marshrýt jasap qoısa, oblysqa qarjy quıylmaı ma? Aıtqandaı, Semeı qalasynyń ózi úlken bir týrıstik jobaǵa suranyp-aq tur. Dál Semeıdeı kóne qala Qazaqstan boıynsha, ekeý-aq. Biri – Oral, endi bir osy – Semeı.
– Búgin, mine, oblysaralyq shekaramyz resmı túrde syzylyp, Abaı oblysy bolyp jatyrmyz. Bir-birimizge qutty bolsyn aıtysyp, máz-máırambyz. Ras, qazaq tarıhynda 2022 jyldyń 8 maýsymy – tarıhı kún. Endigi bizdiń mindet – jańa oblystyń tasyn órge súıreý. О́zimiz tize qosyp, is qylmasaq, syrttan kelip eshkim kósegemizdi kógertpeıdi. Aımaǵymyzdyń ekonomıkalyq ahýalyn arttyrý úshin aldymen mal sharýashylyǵyn, saýda-sattyqty, týrızm salasyn myqtap qolǵa alýymyz kerek, – deıdi semeılik kásipker Erlan Jaqypov.
Basa aıta keterligi, búgingi tarıhı datada Abaı oblysy máslıhatynyń alǵashqy sessııa otyrysy ótip, oblys máslıhatynyń sheshimimen máslıhat hatshysy qyzmetine Qýanysh Súleımenov saılandy.
– Abaı oblysyna, halyqtyń jaǵdaıyn túzetýge bar kúsh-jigerimdi salamyn. Barlyqtaryńyzdy Abaı oblysynyń qurylýymen quttyqtaımyn, – dedi Qýanysh Serikqazyuly.
Q.Súleımenov 1973 jyldyń 14 qyrkúıeginde burynǵy Semeı oblysynyń Shar qalasynda dúnıege kelgen. Semeı memlekettik ýnıversıtetiniń tarıh fakýltetin támamdaǵan. Keıin oqýyn Semeı qalasyndaǵy Shákárim atyndaǵy memlekettik ýnıversıtette «Mal sharýashylyǵy ónimderin óndirý tehnologııasy» mamandyǵy boıynsha jalǵastyryp, aýylsharýashylyq ǵylymdarynyń magıstri atanady. Ol osy ýaqytqa deıin «Shalabaı» JShS bas dırektory qyzmetin atqarǵan.
Sonymen qatar alǵashqy sessııada Abaı oblysy máslıhatynyń turaqty komıssııalaryn qurý, komıssııa múshelerin saılaý týraly máseleler qaraldy. Biraýyzdan komıssııa tóraǵalary da saılandy.
Abaı oblysy