Aqtaý qalasyndaǵy Zııatkerlik mektepte Caspian Startup-2022 halyqaralyq startaptar baıqaýy qorytyndylandy. Dástúrli baıqaýǵa bıyl Qazaqstan, Ázerbaıjan, О́zbekstan, Túrikmenstannan 120-dan astam joba kelip tústi. Olar tabysty startaptardy quryp, ilgeriletýge, sondaı-aq startap mádenıetin qalyptastyrýǵa, ınvestorlar tartýǵa, zııatkerlik menshikti qorǵaýǵa baǵyttalǵan.
Fınaldyq týrǵa qatysýshylar «Bolashaqtyń mektebi», «Áleýmettik máselelerdi sheshý», «Týrızm» atalymdary boıynsha tabysty ómir súrýdi qamtamasyz etetin IT-startaptardy usyndy.
– Jyl saıyn jobalardyń sany artyp keledi, olardyń ataýlary avtorlardyń azamattyq ustanymy men jahandyq jaýapkershiligin rastaıdy, sondyqtan biz Caspian Startup-2022 baıqaýyn áleýmettik taqyrypqa arnadyq, – deıdi mektep dırektory Ásel Beısembınova.
Aıta keteıik, Astana HUB pen Ulttyq zııatkerlik menshik ınstıtýtynyń qoldaýymen uıymdastyrylǵan baıqaýdyń fınaldyq qatysýshylary ınteraktıvti sessııalar men sheberlik saǵattaryna, STEM-bilim, baǵdarlamalaý, avtorlyq quqyq, bıotehnologııa, farmakologııa, balamaly energııa kózderi, sondaı-aq búgingi zamannyń basty basymdyqtaryna arnalǵan dáristerge qatysty. Máselen, krımınalıstıkadaǵy zamanaýı hımııalyq taldaý ádisterine arnalǵan «Sherlok Holmstyń urpaqtary» atty josparly sheberlik saǵaty úlken qyzyǵýshylyq týdyrdy.
Sondaı-aq NIS halyqaralyq bakalavrıat mektebiniń oqýshylary usynǵan TazaLike jobasy ádil-qazylar alqasynyń kóńilinen shyqty. Bul joba qalalardaǵy qaı aýmaqtyń kóbirek qoqystanǵanyn anyqtaıtyn qosymsha. Ony tanymal oıyn marketterinen júktep alýǵa bolady.
Úzdik jobalarymen kózge túsken qatysýshylarǵa Qazaqstan-Brıtan tehnıkalyq ýnıversıtetiniń, Safı О́tebaev atyndaǵy Atyraý munaı jáne gaz ýnıversıteti men Shahmardan Esenov atyndaǵy Kaspıı memlekettik tehnologııalar jáne ınjınırıng ýnıversıtetiniń granttary tabys etildi.