Aqmola oblysynda altyn óndiretin fabrıkanyń jumysshysy qaza tapty. Oqıǵa ótken túnde Zerendi aýdanynyń aýmaǵyndaǵy óndiris oshaqtarynyń birinde bolǵan, dep habarlaıdy Egemen.kz.
Qazir kelip túsken málimet boıynsha 1974 jyly týǵan er adamnyń ústine salmaǵy 1 tonnaǵa jýyq qap qulaǵan. Aýyr jaraqat alǵan jumysshy oqıǵa ornynda kóz jumdy. Bul osy altyn óndirý fabrıkasynda bolǵan alǵashqy oqys oqıǵa emes. Fabrıkada buǵan deıin de birneshe adam óndiristik jaraqat alyp, mert bolǵan edi.
«Anyqtalǵan aqparat boıynsha Kókshetaý qalasynyń turǵyny Altaev О́mirbek Amantaıuly sehta úlken qaptyń astynda qalǵan. Bul derek Qylmystyq kodekstiń 156-baby boıynsha Ishki ister organdarynda tirkeldi. Ol alǵan jaraqattarynan sol jerde kóz jumǵan. Qazir jedel-tergeý jumystary júrgizilip jatyr», dedi Zerendi aýdany ákiminiń orynbasary Áset Qurmanǵojın.
Aıana Toǵanbek