ASTANA. 23 sáýir. Qazaqstan spırtti ishimdikti paıdalaný jaǵynan Ortalyq Azııa elderi arasynda birinshi orynda keledi. Bul týraly búgin
Parlament Májilisiniń kezekti otyrysynda Premer-Mınıstrdiń orynbasary -Qarjy mınıstri Baqyt Sultanov málimdedi.
B.Sultanovtyń aıtýynsha, Qazaqstan jan basyna shaqqanda, Ortalyq Azııada alkogol ónimderin eń kóp tutynatyn, ıaǵnı eń kóp ishetin el bolyp otyr. Alaıda, bul tujyrymǵa depýtat V.Kosarev qarsy shyqty. «Qudaıǵa shúkir, - dedi ol, - búgingi kúni qazaqstandyqtardyń alkogol ónimderin tutyný mádenıeti artqanyn joqqa shyǵarýǵa bolmaıdy. Qazir iship alyp, seleńdep júrgen eshkimdi de kórmeısiń. Eske alý, janaza sekildi sharalarda ol múlde bolmaıtynyn kórip júrmiz. Sondyqtan alkogoldi tutyný mádenıetin arttyra berý jaǵyna kóńil bólý kerek».
Al depýtat Aldan Smaıylov alkogol ónimderin satatyn dúkenderdiń balalar men jasóspirimder ortalyǵynan kem degende 100 metr jerde bolýy týraly talaptyń jobadan túsip qalǵanyna qynjylys bildirdi. Ol sonymen qatar Norvegııanyń tájirıbesin alǵa tartyp, mereke jáne demalys kúnderi araq-sharaptyń múlde satylmaýyna kóńil aýdarý qajettigine nazar aýdardy.
Zań jobasy qysqa talqylaýdan keıin tolyq maquldanyp, ekinshi oqylymǵa daıyndalýǵa jóneltildi.
Jaqsybaı Samrat.
Derekkóz: egemen.kz.
Foto: www.inform.kz.