ASTANA. 23 sáýir. Ońtústik Qazaqstan oblysy Saryaǵash aýdanynda tasbaqalardy alyp bara jatqan adamdar qolǵa tústi. Bul týraly Ulttyq qaýipsizdik komıteti Shekara qyzmetiniń baspasóz qyzmeti habarlady.
Shekarashylar «Keles-Saryaǵash» baǵytyndaǵy poıyzdyń júk vagonyn tekserý kezinde onda aparyla jatqan salmaǵy 3 sentnerge jýyq tasbaqaǵa kezikti. Olar jeti qapqa tyǵyzdalyp salynypty. Endi bolmaǵanda, tunshyǵyp ólýge qaraǵan jándikter qaptyń aýzyn ashqannan keıin ǵana erkin tynys ala bastady.
Sóıtip, sýyq qoldy suǵanaqtardyń tutqynyna tap bolyp, satylýǵa alyp bara jatqan tasbaqalar shekara qyzmetkerleriniń arqasynda qaıtadan bostandyqqa jiberildi.
Aleksandr Tasbolatov.
Derekkóz: Shekara qyzmetiniń baspasóz qyzmeti.
Foto: www.smolzoo.ru.