Bul týraly Densaýlyq saqtaý mınıstrligi Medısınalyq kómekti uıymdastyrý departamenti Ambýlatorııalyq-emhanalyq jáne jedel medısınalyq kómek basqarmasynyń basshysy Batyrhan Sarymsaqov málim etti, dep habarlaıdy Egemen.kz.
«Qazirgi kezde Qazaqstanda qan quıý salasynda jumys isteıtin 470-ke jýyq medısına uıymy bar. Jyl saıyn bizde shamamen 80 myńǵa jýyq naýqasqa qan quıylady. Olarǵa 400 myńǵa jýyq qan quıý prosedýrasy júrgiziledi. Elimizde medısına uıymdary 100 paıyz qan jáne onyń komponentterimen qamtamasyz etiledi. Kóbine qan komponentteri akýsherlik tájirıbede, onko-gematologııada, hırýrgııada jáne travmatologııada paıdalanylady», dedi B. Sarymsaqov Ortalyq kommýnıkasııalar qyzmetinde.
Vedomstvo basshysynyń sózinshe, elimizde 2 myńnan asa azamat donor bolyp sanalady. Sonymen qatar 100-den asa adam «Qurmetti donor» atanǵan. Qazaqstanda bul ataqty alý úshin 40 ret qan tapsyrý kerek. 2005 jylǵy mamyrda ótken Dúnıejúzilik densaýlyq saqtaý assambleıasynda álemniń densaýlyq saqtaý mınıstrleri óz erkimen qan tapsyrýdy qoldaý týraly ótinishti qabyldady.
«Bul sala memlekettiń qoldaýynsyz óziniń nátıjesin bermeıdi. 2008 jyldan bastap elimizde zamanaýı 10 qan ortalyǵy quryldy. Bul ortalyqtar sońǵy býyndy tehnologııamen qamtyldy. TMD elderi arasynda Qazaqstan birinshi bolyp qan donorlaryna qatysty eki kezeńdi skrınıngti engizdi. Bul óz kezeginde ınfeksııalyq aýrýlardy anyqtaýǵa kómektesedi», dedi basqarma basshysy.
Búkilálemdik qan tapsyrýshy kúnin jyl saıyn maýsymnyń 14-inde ótkizip turý týraly qarar qabyldandy.