Eńseli Ekibastuz qalasy 65 jyldyǵyn dúrkiretip atap ótti. Elimizdiń otyn-energetıka kesheniniń kemeldenýine úlken úles qosqan kómirli shahardyń sońǵy jyldary ajary kelise túsken. «Taza qala» degen ataǵy burynnan bar. Endigi jerde monoqalalardy damytý baǵdarlamasy sheńberinde Ekibastuz damýdyń dańǵyl jolyna túsip, el ekonomıkasynyń órkendeýine atsalysady degen senim basym.
Tarıhı qujattarǵa kóz júgirtsek, Ekibastuz qalasynyń irgetasy 1957 jyly qalanypty. «Elý jylda – el jańa» demekshi, sodan beri ár salada satylaı damýdyń kórinisi kóp. Búginde Ekibastuz – elimizdiń energetıkalyq ortalyǵy. Munda búkil Qazaqstandaǵy energııanyń 40 paıyzy óndiriledi. Kómirli shahardaǵy GRES-1 jáne GRES-2 stansalary Qazaqstannyń birtutas elektr energetıkalyq júıesiniń soltústik jáne ońtústik aımaǵynyń negizgi energııa kózderi bolyp sanalady. Atalǵan stansalar áldeqalaı «túshkirer» bolsa, ózge nysandardyń «tumaýratyp» qalatyny da sondyqtan.
Shyraıly shahar basqa qyrymen de tanylmaq nıette. Qala ákimi Ardaq Qańtarbaev jaǵymdy jańalyqtarmen bólisti.
– «Prommashkomplekt» kompanııalar toby «QTJ» UQ» AQ-nyń dońǵalaq juptaryna degen barlyq qajettigin qamtamasyz etedi. Sonymen qatar qýattylyǵy jylyna 240 myń tonna ferrosılısıı shyǵarýǵa múmkindik beretin jańa ferroqorytpa zaýytynyń qurylysy bastaldy. Sondyqtan jaqyn arada Ekibastuz metallýrgter qalasyna da aınalady, – dedi ákim.
Shahardyń 65 jyldyǵyn toılaý jyl basynan bastalyp ketti. Buǵan deıin jańa turǵyn úıler boı kóterip, ózge de nysandar ashylǵan edi. Toıdyń qyzyǵy ıppodrom aýmaǵynda jáne «Shahter» demalys saıabaǵynda jalǵasyn tapty. Ippodrom aýmaǵynda kókpardan oblystyq týrnırdiń fınaly ótip, turǵyndar tulparǵa taqym qysqan atbegilerdiń ónerin tamashalady. Dúbirli dodaǵa Baıanaýyl, Maı, Aqtoǵaı aýdandarynan jáne Ekibastuz óńirinen 9 komanda qatysty. Nátıjesinde, 1-oryndy Aqkól aýylynyń «Saıfýllah» komandasy, 2-oryndy Maı aýdanynyń «Saty» komandasy jáne 3-oryndy Maı aýdanynyń «Aqshıman» komandasy ıelendi.
«Shahter» mádenıet jáne demalys saıabaǵynda ótken merekelik konsertke kelgen qala turǵyndary Roza Baǵlanova atyndaǵy «Qazaqkonsert», Isa Baızaqov atyndaǵy oblystyq fılarmonııa, djaz orkestri jáne basqa da shyǵarmashylyq ujymdardyń ónerine tánti boldy. Myń buralyp bılegen horeografııalyq toptar, balalar kórkemsýret mektebiniń tárbıelenýshileri qala turǵyndary men qonaqtaryna biregeı sán úlgilerin kórsetti.
«Atamura» mádenıet ortalyǵynyń uıymdastyrýymen «О́ner» qalalyq mádenıet saraıynda «Jyr arqaýy – Ekibastuz!» atty respýblıkalyq aqyndar aıtysy ótti. Jyr dodasyna elimizge tanymal 12 aqyn qatysyp, baq synady. Aýzymen qus tistegen jyr jampozdary qalanyń jetistigi men jeńisin jyrlaı otyryp, halyqtyń jaǵdaıyn, eldegi ahýaldy da tilge tıek etti. Qazynaly ónerge tórelik etken qazylar alqasynyń sheshimimen 1 mln teńgelik bas júldeni Almaty oblysynan kelgen aqyn Rústem Qaıyrtaı enshiledi. Birinshi oryn Erkebulan Qaınazarovqa (Túrkistan oblysy – 800 myń teńge), ekinshi oryn Aspanbek Shuǵataevqa (Baıanaýyl aýdany – 600 myń teńge), úshinshi oryn Raýan Qaıdarov (Ekibastuz qalasy – 400 myń teńge) buıyrdy.
Pavlodar oblysy,
Ekibastuz qalasy