Pavlodar qalasyndaǵy 17 kósheniń ataýy ózgertildi. Ábden eskirgen Taganrogskaıa, Sovhoznaıa sııaqty kóshelerdiń taqtaıshalary kelmeske ketti. Pandemııa saldarynan bul baǵyttaǵy jumystar biraz úzilis alǵan edi. Endi, mine, mańyzdy sharýa qaıtadan jalǵasyn taýyp otyr. Ataýy túkke turmaıtyn kent jáne qala ataýlarynyń da aýysatyn ýaqyty jaqyndaı túskendeı.
Mańyzdy qujatqa kóz júgirtsek, budan bylaı Mır kóshesi Oljabaı batyr kóshesi bolyp atalmaq. Al Ýrıskıı kóshesi General Smaǵulov kóshesine, 1-ıa Iýjnaıa kóshesi Birlik kóshesine, 2-ıa Iýjnaıa kóshesi Káýken Kenjetaev kóshesine, Parkovaıa kóshesi Muqaǵalı Maqataev kóshesine, Doneskaıa kóshesi Maǵjan Jumabaev kóshesine, Kýbanskaıa kóshesi Qalmuqan Isabaı kóshesine, Sovhoznaıa kóshesi Rafıqa Nurtazına kóshesine, Taganrogskaıa kóshesi Qazanǵap bı kóshesine, Angarskaıa kóshesi Naǵymbek Nurmuhammedov kóshesine, Chıtınskaıa kóshesi Amanjol Shámkenov kóshesine, Dekabrıstov kóshesi Qamar Qasymov kóshesine, Iýnnatov kóshesi Dıhan Ábilev kóshesine, 1-ıa Sovetov, 2-ıa Sovetov kóshesi General Bákirov kóshesine, Zyrıanovskaıa kóshesi Qabdykárim Ydyrysov kóshesine, Saıanskaıa kóshesi Alma Ájibaeva kóshesine, Lesnaıa kóshesi Aǵaıyndy Dúısembınovter kóshesine ózgertildi.
Pavlodar qalasynda 334 kóshe bar eken. Qazirgi tańda olardyń 85-i (26 paıyzy) qazaqsha, 249-y (74 paıyz) ózge tildegi ataýlar. Baıqasańyz, áli de bul baǵyttaǵy jumystardyń júıeli atqarylǵany qajet-aq. Sońǵy 5 jyldyń ishinde oblys ortalyǵynda 18 kósheniń ataýy ózgertilip, ıdeologııalyq turǵyda eskirgen kósheler Qudaıbergen Suraǵanov, Álıhan Bókeıhanuly, Ermuhan Bekmahanov, Edige bı, Buqar jyraý, Saǵadat Nurmaǵambetov, Malaısary batyr, Baıan batyr, Shákárim Qudaıberdiulynyń esimderimen qaıta atalsa, qalanyń shet jaǵynda az ǵana jer úılerden qamtylǵan kóshelerge berilgen Máshhúr Júsip, Júsipbek Aımaýytov babalarymyzdyń esimderi ortalyqtaǵy basty kóshelerge ózgertilgen. Osylaısha, endi Derıbas, Lenın, Kýtýzov, Sývorov, 1 Maı, Dımıtrov, Karl Marks, Kırov, Korolenko, Volodarskıı, Krýpskaıa, Chkalov, Pahomov, Bestýjev kósheleri muraǵat qujattarynda ǵana kezdesetin bolady.
Oblystyq mádenıet, tilderdi damytý jáne arhıv isi basqarmasy basshysynyń orynbasary Medet Taýasqannyń málimetinshe, 2021 jyldyń 3 sáýirinde Pavlodar qalasynyń 30 kóshesin qaıta ataý boıynsha kópshilik tyńdaý ótkizilgen. Kópshilik tyńdaýdaǵy talqylaý kezinde usynylǵan 30 kósheniń 23-i jergilikti turǵyndar tarapynan qoldaý tapqan.
– Kópshilik tyńdaýda qoldaý tapqan 23 kóshe 2021 jyldyń 23 sáýirinde Respýblıkalyq onomastıka komıssııasynyń otyrysynda qaralǵan bolatyn. Otyrysta 17 kósheniń ataýyn ózgertý boıynsha sheshim qabyldandy. Buǵan deıin esimderi kóshelerge beriletin tulǵalardy turǵyndarǵa nasıhattaý jumystary keń kólemde júrgizildi (maqalalar, posttar, qysqa metrajdy fılmder, kórmeler, baıqaýlar, dóńgelek ústelder, tanymdyq saǵattar, aksııalar, onlaın dárister, telebaǵdarlamalar, sıýjetter, suhbattar). Bul kósheler aldaǵy ýaqytta oblystyq máslıhattyń sessııasynda qaralyp, oblys ákimdigi men máslıhattyń birlesken sheshimi negizinde qaıta atalatyn bolady, – deıdi M.Taýasqan.
О́kinishke qaraı, Respýblıkalyq onomastıka komıssııasy Ermakov, Teplov, Sıolkovskıı, Naberejnaıa, Molodejnaıa, Roza Lıýksembýrg kóshelerin qaıta ataý týraly usynystardy qabyldamapty. Ol sharýa ýaqyt enshisinde dep seneıik. Aıtpaqshy, Respýblıkalyq onomastıka komıssııasynda qoldaý tapqan kóshelerdi tolyqtaı ózgertý jumystary 2021 jyly ulttyq sanaq boıynsha jarııalanǵan moratorııge baılanysty jyl sońyna deıin múmkindik bolmapty. Qazirgi ýaqytta atalǵan moratorıı alynyp, kóshelerdi qaıta ataý boıynsha jumystar óz jalǵasyn tabýda.
Jaǵymdy jańalyqty pavlodarlyqtar qýana qabyldaǵany ras. Áleýmettik jelilerde «odan da mańyzdy sharýalar jetkilikti» dep keri tartqandar da bar. Qoǵam belsendisi Erkeǵalı Janǵazy kóshe ataýlarynyń qazaqshalanýy Jańa Qazaqstanǵa degen nyq qadam ekenin atap ótti.
– Maǵynasy hám qundylyǵy joǵalǵan kóshe ataýlaryn ózgertý – ýaqyt talaby. Olardyń qazaqshalanýy jastarǵa degen qamqorlyq, baıandy bolashaqqa degen oń qadam dep esepteımin. Eski ataýlardy qazaqshalandyrýmen qatar oblysqa eńbegi sińgen tulǵalardyń esimin berý de mańyzdy. Áli de ataýy eskirgen kósheler kóp. Pandemııa saldarynan tıisti jumystar toqtap qalyp, bıyl jalǵasyn tabýda. Mańyzdy úrdis toqtamaıdy dep senemin. Elim, jerim degen rýhty azamattar árdaıym osy sharýanyń basy-qasynan tabylamyz, – deıdi E.Janǵazy.
Jýyrda «Egemen Qazaqstan» betinde Káýken Kenjetaev jáne Qazanǵap bı týraly maqalalar jarııalanǵan edi. Osylaısha, el gazeti Pavlodar qalasyndaǵy jańa kóshelerdi nasıhattaýǵa tıtteı de bolsyn úles qosty dep aıtýǵa negiz bar.
Pavlodar oblysy