Pavlodar qalasynda «Qymyzmuryndyqtyń» qyzyǵy qaıta jalǵasty. Olaı deıtinimiz, «Nur-Ana álemi» qoǵamdyq birlestigi jyl saıyn dúrkiretip toılaıtyn dástúr pandemııa saldarynan eki jyl úzilis alǵan bolatyn. Bıyl turǵyndarǵa 750 lıtr qymyz úlestirildi.
«Nur-Ana álemi» qoǵamdyq birlestiginiń tóraıymy Baqytjamal Maksılovanyń aıtýynsha, «Qymyzmuryndyq» dástúri 1994 jyldan beri dáriptelýde.
– Is-sharany ótkizýdegi basty maqsat – umyt bolǵan dástúrdi jańǵyrtý jáne keleshek urpaqqa nasıhattaý. Odan bólek «Sabantoı» dástúrin de atap ótemiz. Bul jobany Zara Qojahmetova anamyz bastaǵan edi. «Nur-Ana álemi» qoǵamdyq birlestigi músheleri osy merekeni jalǵastyryp kelemiz, – deıdi B.Maksılova.
Is-shara barysynda Qazaqstan Musylmandary dinı basqarmasynyń Pavlodar oblysyndaǵy ókil ımamy Joldas Qospaquly bata berip, qymyzdan dám tatty. Oblystyq J.Aımaýytov atyndaǵy qazaq mýzyka-drama teatrynyń ártisteri sahnalyq
qoıylym qoıyp, ájeler ansambli jınalǵan qaýymǵa ásem ánderden shashý shashty. Jınalǵandar asyq atýdan baq synady.
Is-sharany ótkizýge qalalyq ákimdik qoldaý kórsetkenin atap ótken jón. Jergilikti joǵary oqý oryndary da atsalysyp, ár ýnıversıtet 250 lıtr qymyz ben 50 kılo baýyrsaqtan ákelgen.
Pavlodar oblysy