Nur-Sultan qalasynyń ákimi Altaı Kólginov óziniń Instagram-daǵy paraqshasynda Beıbitshilik jáne kelisim saraıy janyndaǵy saıabaqta kaskadty amfıteatr salynatynyn jazdy, dep habarlady Egemen.kz.
«Qalanyń barlyq aýdanynda, sol sııaqty eldi mekenderde qoǵamdyq keńistikterdi (saıabaqtar, gúlzarlar, jelekjoldar) jáne aýla aýmaqtaryn abattandyrý boıynsha jumystar júrgizemiz.
Bıyl tartymdy oryndar qatary tipten arta túsedi. Qala turǵyndary men qonaqtary taza aýada, bos ýaqytyn densaýlyǵyna paıdaly ótkize alatyn 200-den asa jaıly oryn bolmaq. Osyǵan deıin 500 aýla aýmaǵy men qoǵamdyq keńistik abbattandyryldy, olardyń bári tartymdy oryndardyń birine aınaldy. Osylaısha elordamyz aqyryndap «kólik júrgizýshiler qalasynan» «jaıaý júrginshilerge arnalǵan qalaǵa» aınalyp keledi.
Kaskadty amfıteatr qurylysynyń barysymen tanystym. Amfıteatr kelesi aıda ashylady. Ol Esil ózeni men Beıbitshilik jáne kelisim saraıynyń (Almaty aýdanyndaǵy Nájimedenov kóshesi tusynda) arasynda ornalasqan. Osylaısha, janyndaǵy saıabaqty úılesimdi túrde jalǵaı túsedi, bul mańaıda osyǵan deıin kópir asty keńistigi abattandyrylǵan bolatyn.
Amfıteatr is-sharalar men spektaklder ótkizýge arnalǵan, sol sııaqty jastardyń talantyn ashatyn oryndardy ári qala turǵyndarynyń demalatyn aýmaǵyn qamtıdy. Búldirshinderge arnap janynan oınaýǵa arnalǵan alańqaı ashamyz. Elordamyz Memleket basshysynyń tapsyrmasy boıynsha «Nur-Sultan – jaıly qala» master-jospary aıasynda damyp keledi», dep jazdy elorda ákimi.