Qazaqstan Ulttyq Banki (QUB) ózderin ınvestısııalyq kompanııa retinde kórsetip júrgen alaıaq toptardyń belsendi áreketke kóshkenin eskertti, dep habarlaıdy Egemen.kz.
Qaskóıler mobıldi qosymshalar, saıttar men jarnamalyq rolıkter jasaýǵa beıimdelip alǵan. Olardyń mazmuny jeke tulǵalardyń qarajatyn basqarýǵa tartý sekildi baǵdarlamalardy sıpattaıdy jáne ony ekinshi deńgeıli banktermen, QUB-pen nemese basqa da memlekettik organdarmen birlesip ázirlengen dep kórsetedi. Mundaı jarnamalar – feık.
«Anyqtalǵan alaıaqtyq pıǵyldaǵy resýrstar men telefon qosymshalary Qazaqstannyń «memlekettik qorynan», «Ulttyq resýrstardan» nemese qarjy naryǵyn dınamıkalyq boljaýdan tez paıda tabýdy usynady, alaıda, mundaı múmkindikter tek tólem jasaǵan qoldanýshyǵa ǵana beriledi. Sondaı saıttarǵa ótinish qaldyrǵan ınternet-qoldanýshylar aqshasynan aıyrylatyndaı táýekelge barady: alaıaqtar aldymen onyń jeke derekterin qolǵa túsiredi, sóıtip telefon arqyly habarlasyp, aqshany óz rekvızıtterine aýdartyp alýǵa áreket etedi. Ári qaraı, aqsha aýdarylǵannan keıin ony keri qaıtarý prosedýrasy uzaq ta kúrdeli bolýy múmkin. Sóıte tura salynǵan qarajatty keri qaıtarý úshin qosymsha aqsha salýǵa qoldanýshyny taǵy májbúrleýi yqtımal», dep túsindirdi Ulttyq bank.
Sondaı-aq Ulttyq Bank jeke tulǵalardyń shottaryna qyzmet kórsetpeıtinin, aqshalaı esep aıyrysýlar men mámileler jasamaıtynyn, memlekettik qorlarda tabys tabý úshin qandaı da bir platformalar ázirleýge qatyspaıtynyn aıtty.
Osyndaı saıttarǵa, mobıldi qosymshalarǵa tap bolǵandar nemese telefon-alaıaqtarynyń qurbany bolǵandar – alaıaqtyq faktisi boıynsha quqyq qorǵaý organdaryna aryzben júginýi qajet.
Oǵan qosa, Ulttyq Banktiń resmı baılanys ortalyǵyna 1477 qysqa nómiri arqyly habarlasýǵa bolady.
Aıana Toǵanbek