Jaqynda japondyq tanymal Maki Asami Ballet trýppasymen birlese óner kórsetip, qazaqstandyq balettiń joǵary deńgeıin jat elde pash etip qaıtqan «Astana Opera» teatrynyń jetekshi solısi Arman Orazovtyń talanty kúlli Kúnshyǵys eli kórermenderin tánti etti. Onyń oryndaýyndaǵy Morıs Jarrdyń mýzykasyna kórnekti horeograf Rolan Petıdiń qoıǵan «Parıj Qudaı anasynyń sobory» spektaklindegi Febtiń partııasy japondyqtar úshin shyn máninde ónerdiń úlken jańalyǵy boldy.
Japonııa balet trýppalary jahanǵa óziniń san alýan saltanatymen tanymal. Solardyń biri – bı bekzadasy Armanmen tandemde jumys istegen Maki Asami Ballet ujymy. Spektakl Tokıodaǵy bedeldi Bunka Kaikan Hall sahnasynda ótti. «Astana Operanyń» jetekshi solısi spektakldegi kapıtan Febtiń partııasyn keremet oryndap, japondyq kórermenniń súıispenshiligine bólendi.
– Japondyqtardyń Febtiń partııasyn oryndaýǵa ádeıilep shaqyrǵany men úshin zor maqtanysh. Bul aıtýly partııamen shetelde birinshi ret óner kórsetýim emes. Osyǵan deıin bizdiń trýppa Sankt-Peterbýrgtaǵy áıgili Marııa teatrynda «Parıj Qudaı anasynyń sobory» balettik spektaklin usynǵan bolatyn. Árıne, kúnde kórip júrgen áriptesterińmen óner kórsetý, bir sahnada bıleý basqa da, beıtanys ártistermen jumys isteý múlde bólek. Ásirese bul jas ártis úshin teńdessiz tájirıbe. Osy saparymda men óz ónerimmen Qazaqstandy, tól teatrymdy tanystyrǵannan keıin, maǵan burynǵydan da zor jaýapkershilik artyldy, boıymdaǵy barlyq kásibı sheberligimdi kórsetýge tyrystym. Maǵan bildirgen qoldaýy úshin balet trýppasynyń kórkemdik jetekshisi Altynaı Asylmuratovaǵa alǵysym sheksiz, – dep aǵynan jaryldy teatrdyń jetekshi solısi Arman Orazov.
Bul otandyq daryndy ártistiń Kúnshyǵys eline alǵashqy barýy bolsa da, ol ónerde shekara joq ekenin, sheteldik áriptesterimen alǵashqy daıyndyqtan keıin-aq dostasyp ketkenin aıtyp, japondyqtardyń qonaqjaılyǵyna bas ıip qaıtqandyǵyn da tamsana jetkizdi. Eki kún qatarynan kórermen nazaryna usynylǵan spektaklde otandasymyz Maki Asami Ballet trýppasy, sondaı-aq Fransııa men Italııadan shaqyrylǵan solıstermen tamasha tandemde óner kórsetti. Álemniń áıgili balet bıshilerimen birge bıleýge Armandy Rolan Petıdiń assıstenti, áıgili baletmeıster Lýıdjı Bonınonyń ózi arnaıy shaqyrýy da – ulttyq balet óneri úshin zor tabys ekeni sózsiz.
– Biz Lýıdjı Bonınony kópten beri bilemiz. Ol óte keremet adam jáne bıdiń egjeı-tegjeıine deıin jiti mán beretin kánigi kásibı maman. 2016 jyly ol «Astana Operaǵa» Rolan Petıdiń horeografııasynda «Parıj Qudaı anasynyń sobory» áıgili spektaklin alyp keldi. Odan keıin osy kórnekti horeograftyń qoıylymynda Leo Delıbtiń áıgili «Koppelııa» tanymal baletin usyndy. Japonııada meni Lýıdjı Bonıno kútip alyp, ekeýimiz birge on kún boıy óner kórsetýge daıyndaldyq, – dep japon saparyndaǵy áserimen bólisken ártis otandyq balet óneriniń bolashaǵyna qatysty da oıyn ortaǵa saldy:
– Búginde qazaqstandyq balet álemdik deńgeıde tur dep nyq senimmen aıta alamyn. Bizdiń ártisterdiń shet elderde óner kórsetip, spektaklder men gala-baletterge qatysýǵa shaqyrtý alyp jatqany – osynyń aıqyn dáleli. Buǵan deıin Oman, Italııa men Ispanııada tabysty ótken gastroldik óner kórsetýlerimiz kezinde, sondaı-aq osy jolǵy sapar barysynda da buǵan anyq kóz jetkizdim, – dep oıyn túıindedi bıshi.
Bul alys-jaqyn shet elderdi ónerimen tamsandyryp júrgen «Astana Operanyń» daryndy ártisi Arman Orazovtyń akterlik sheberlik pen tehnıkalyq daıyndyq turǵysynan jat eldi tańdaı qaqqyzyp kelgen alǵashqy sapary emes. Onyń qorjynynda Qazaqstannan bólek, Germanııanyń bedeldi halyqaralyq baıqaýlarynyń da jeńisteri bar. Japonııada jarqyrap júrip jarqyn óner týdyrǵan talantqa tamsana qol soqqan kórermen qoshemeti – rııasyz kóńil rızashylyǵy edi.